2017-2021 jyldar aralyǵynda mashına jasaý salasyndaǵy ǵylymı-zertteý jáne tájirıbelik-konstrýktorlyq jumystardy júrgizýge nebári 2,3 mlrd teńge jumsaldy dep habarlaıdy Almaty-akshamy.kz
Ashyq NQA portalynda jarıalanǵan mashına jasaý salasyn damytýdyń 4 jyldyq keshendi josparynda osylaı jazylǵan, dep jazdy Qazaqparat.
«Otandyq mashına jasaý ónimderi álemdik naryqta jetkiliksiz usynylǵan. 2021 jyly onyń úlesi 0,02% ǵana boldy. Máselen, Reseıdiń mashına jasaý ónimderiniń álemdik eksportyndaǵy úlesi - 0,3%, Koreıa - 4,6%, AQSH - 8,3%, Germanıa - 9,6%, Qytaı - 20%. Bul osy elderdegi ǵylymı-zertteý jáne tájirıbelik-konstrýktorlyq jumystardy aıtarlyqtaı qarjylandyrýǵa baılanysty», - dep jazylǵan qujatta.
Mınıstrlik málimetinshe, 2017-2021 jyldar aralyǵynda ǵylymı-zertteý jumystaryn júrgizýge arnalǵan óńdeý ónerkásibindegi ishki shyǵyndar 12,3 mlrd teńgege teńelgen.
«Óńdeý ónerkásibindegi mashına jasaý salasyna arnalǵan ǵylymı-zertteý jáne tájirıbelik-konstrýktorlyq jumystaryna nebári 2,3 mlrd teńge jumsaldy. Ol jalpy qarjynyń 18,8%-y. Al metalýrgıa salasyna 2,8 mlrd teńge nemese jalpy kóleminiń 22,6%-y baǵyttaldy», - delingen Indýstrıa jáne ınfroqurylymdyq damý mınıstrliginiń taldaý derekterinde.
Buǵan deıin habarlaǵanymyzdaı, Qazaqstandaǵy mashına jasaý salasyn damytýdyń 2024-2028 jyldarǵa arnalǵan keshendi jospary bekitilmek.