Qazaqstandyq kásipker Eldos Aıbekov Afrıka qurlyǵyndaǵy aýyz sýǵa muqtaj halyqqa qudyq qazyp berdi.
Qazaqstan atynan syıǵa tartylǵan qudyq Ýganda memleketindegi Nanoko eldi mekeninde ornalasqan. Ýgandanyń The Ngali Development Foundation (Ngalı damytý qory) kompanıasymen baılanys ornap, nátıjesinde qudyq qazý úshin ekijaqty kelisimge kelgen, dep habarlaıdy Almaty-akshamy.kz
Qudyqtyń qurylysy aqpan aıynda bastalyp, naýryzdyń 12 kúni aıaqtaldy. 13 naýryzda ashylý saltanaty uıymdastyrylyp, jergilikti turǵyndar qazaqstandyqtarǵa alǵystaryn bildirdi.
«Biz taza sýǵa qol jetkize almaı otyrǵan aýyl turǵyndarymyz. Qarapaıym turmys keshemiz. Azyn-aýlaq eshki ustaımyz. Qazir sýdy 5 km jerdegi ózennen tasyp iship otyrmyz. Bul, árıne, taza sý emes. Munyń bárin balalarymyz tasyp ákeledi. Motosıkl, velosıpedi bar adamdar sırek. Kóbine jaıaý tasımyz. Balalardyń qalaı qýanǵanyn kórdińiz be?! Olardyń qýanyshyn kórip, biz de erekshe qýanyp turmyz. Eldos myrzaǵa kóp raqmet. Biz Qazaqstan degen memleket jaıly múlde bilmeıtin edik. Osy jaǵdaıdan keıin eshqashan umytpastaı boldyq. Qazir bolǵan qýanyshty kórgen balalar Qazaqstandy, kók Týlaryńyzdy máńgi jadynda saqtap qalary anyq. Qazaqstanǵa sálem!» – dedi Nanoko turǵyny Sooka Sharıf.
Kásipkerdiń aıtýynsha, qudyq qazýǵa qatysty eki tańdaý bolǵan.
«Qudyq qazýǵa qatysty bizde eki tańdaý boldy. Biri – Ýganda, ekinshisi – Kenıa. Ekeýi de Shyǵys Afrıkada ornalasqan. Alǵashynda qudyqty Kenıadan qazamyz dep oıladyq. Óıtkeni, Kenıadaǵy qyzmettiń baǵasy Ýgandaǵa qaraǵanda arzan boldy. Keıin qos memleketke analız jasap, Ýgandanyń JİÓ-si Kenıadan 3 ese tómen ekenin kórdik. Oılana kele, qudyqty taza sýǵa shyn muqtaj halyqqa qazyp bereıik degen qorytyndyǵa keldik. Búgin qudyǵymyzdy qoldanysqa berdik. Turǵyndardyń, balalardyń qýanyshyn kórip erekshe tolqynysty kúı keshtim. Bul jobamyz Qazaqstan men Ýganda memleketteriniń arasyndaǵy baılanysty nyǵaıta túsedi degen senimdemiz», – dedi ol.
Eldos Aıbekov TMD bıznes naryǵynda 15 jylǵa jýyq kásippen aınalysyp keledi. Ol osy ýaqytqa deıin jalpy quny 15 mln turatyn DSP-naýqastaryna arnalǵan apparattardy tegin taratqan. Aı saıyn áleýmettik turmysy tómen otbasylarǵa azyq-túlik, materıaldyq, qarjylyq kómek kórsetedi.
