Aqshasyz operasıalardyń sany men kólemi 5,4 trln teńge somasyna 438,5 mln tranzaksıany qurady.
Qazaqstanda qolma-qol aqshasyz operasıalar sany artyp keledi. Bul týraly búgin Úkimet otyrysynda QR Ulttyq bank tóraǵasy Ǵalymjan Pirmatov aıtty, dep habarlaıdy Almaty-akshamy.kz QazAqparatqa silteme jasap.
«Bıylǵy jyldyń qańtar aıynda Ulttyq bank tólem júıeleri arqyly 52,5 trln teńge somasyna 4,2 mln tranzaksıa júrgizildi. Ortasha alǵanda, bir kúnde tólem júıeleri arqyly 2,9 trln teńge somasyna 232,5 myń tranzaksıa oryn aldy. 2022 jylǵy qańtarda qolma-qol aqshasyz operasıalardyń sany men kólemi 5,4 trln teńge somasyna 438,5 mln tranzaksıany qurady», - dedi ol.
Ǵalymjan Pirmatovtyń aıtýynsha, qazaqstandyq bankterdiń el ishinde klıenttik jáne menshikti tólemder men aqsha aýdarymdaryn júrgizý boıynsha barlyq operasıalary shtattyq rejımde júzege asyrylýda.
«Ulttyq bank naqty ýaqyt rejıminde jaǵdaıdyń damýyn jáne olardyń naryqtarǵa yqpalyn qadaǵalap otyrady. Qazaqstannyń qarjy júıesine Reseıge qarsy sanksıalardyń áser etý dárejesin baǵalap, qarjy jáne baǵa turaqtylyǵyn qamtamasyz etý úshin is-sharalar qabyldaýdy jalǵastyrady», - dedi Ulttyq bank tóraǵasy.