Sońǵy kezderi aýyz qýysynda metalǵa tózbeýshiligi bar naýqastardyń sany artyp keledi
Elimizde metalǵa alergıasy bar adamdarǵa arnalǵan tis protezi jasaldy, dep habarlaıdy Almaty-akshamy.kz.
Densaýlyq saqtaý mınıstrligi taratqan aqparatqa sáıkes, Sanjar Asfendıarov atyndaǵy Qazaq Ulttyq medısına ýnıversıtetiniń ortopedıalyq stomatologıa kafedrasy aǵzaǵa ýytty áser etpeıtin otandyq qurylymdyq jáne qosalqy tis protezdik materıaldardy usyndy.
Sońǵy kezderi aýyz qýysynda metalǵa tózbeýshiligi bar naýqastardyń sany artyp keledi. Metal-keramıkalyq protezder úshin keń taralǵan negizgi metaldardyń qorytpalary aǵzaǵa, aýyz qýysynyń tinderine jáne adam aǵzasynyń jalpy jaǵdaıyna janama áser etýi múmkin.
Stomet-1kz jáne stomet-2kz qorytpalary eksperımenttik janýarlar aǵzasyna teris áserdi tolyǵymen joıýǵa múmkindik beretin zertteýden ótti. Bul eksperımenttiń barlyq toptary men serıalarynda baýyrdyń mınımaldy ózgerýin kórsetti.
Sonymen qatar qorytpalar medısınada qoldanýǵa jetkilikti berik qalypta boldy. Otandyq stomet-1kz, stomet-2kz stomatologıalyq qorytpalary úshin MEMST 31575-2012 nómirine sáıkes keminde 25 MPa bolýy tıis kerneýdiń jetkilikti shamasy bar ekenin kórsetken eksperımenttik zertteýler júrgizildi.
Si quramyn 1%-ǵa arttyra otyryp, ázirlengen otandyq qorytpalardyń usynylatyn hımıalyq quramy Stomet-1kz jáne stomet-2kz qorytpalarynyń keramıkamen metaldyń adgezıa beriktigin edáýir arttyrady. Iaǵnı, Stomet-1kz qorytpasy 1,2 ese, Stomet-2kz qorytpasy úshin 1,3 ese bolady.
Jalpy, ortopedıalyq stomatologıa kafedrasy 12 ınovasıalyq patent alyp, ımpakt-faktory bar ǵylymı jýrnaldarda (AQSH, Shvesıa, Reseı, Germanıa, Túrkıa, BAÁ, Ózbekstan, Qyrǵyzstan) osy taqyryp boıynsha 32 ǵylymı jumys jarıalady.