Bul ýnıversıtet ınfraqurylym men kólikti qosa alǵanda, ártúrli salalardaǵy zertteýler men ınovasıalar shoǵyrlanǵan álemdik ortalyq sanalady
Memlekettik tapsyrma sheńberinde tájirıbe almasý maqsatynda Qazaqstan jol ǵylymı-zertteý ınstıtýtynyń mamandary Kalıfornıadaǵy Berklı ýnıversıtetimen strategıalyq mańyzdy yntymaqtastyq ornatty, dep habarlaıdy almaty-akshamy.kz. Atap aıtqanda, ýnıversıtettiń zıatkerlik ınfraqurylym ortalyǵynyń dırektory, profesor Shahzod Tahırovpen birlesken jumys týraly kelisimge qol qoıyldy.
Búginde PhD doktory Sh.Tahırov sensorlyq qondyrǵylardy zertteý men jol ınfraqurylymyna engizýge baǵyttalǵan tehnologıalardy ázirlep jatyr. Halyqaralyq deńgeıdegi jolshylardyń pikirlerine súıensek, bul tehnologıa aqaýlardy aldyn-ala boljaýǵa jáne anyqtaýǵa múmkindik beredi, sonymen birge avtojoldardy kútip ustaý men paıdalanýdyń tıimdiligin arttyrýǵa kómektesedi.
«Osy yntymaqtastyqtyń nátıjesinde elimizdiń avtomobıl joldaryna ınovasıalyq tehnologıalardy engizýge bolady. Bul kólik ınfraqurylymyn damytýǵa jáne onyń senimdi túrde paıdalanýǵa yqpal etedi. Qol qoıylǵan kelisimder avtomobıl joldaryn monıtorıńileý jáne olarǵa qyzmet kórsetý, sondaı-aq kólik ınfraqurylymyn damytý, jol qurylystarynyń qaýipsizdigi men senimdiligin qamtamasyz etý salasyndaǵy jaqsy kórsetkishterge yqpal etýi múmkin», dep atap ótti QazjolǴZI vıse-prezıdenti Erik Ámirbaev.
Sonymen qatar qazaqstandyq jolshylar AQSH-qa jumys sapary barysynda Sensor Fusion and Monitoring Technologies kompanıasyna bardy. Otandyq mamandar jol qurylymdaryn monıtorıńteý jáne testileý salasyndaǵy ozyq tehnologıalarmen tanysty.