Jańa tehnologıany qurylysqa qajetti shokolad tústi kirpishti jasaý úshin qoldanýǵa bolady.
Eýrazıa ulttyq ýnıversıtetiniń ǵalymy Rýslan Safarov áriptesterimen birge marganes keninen trımarganes tetraoksıdi boıaǵyshyn alýdyń jolyn tapty dep habarlaıdy Almaty-akshamy.kz EUÝ baspasóz qyzmetine silteme jasap. Jańa tehnologıany qurylysqa qajetti shokolad tústi kirpishti jasaý úshin qoldanýǵa bolady. Ǵalymdar bul ádisti komersıalandyrýdy jáne óndiriske engizýdi josparlap otyr.
Trımarganes tetraoksıdi boıaǵyshyn alýdyń jańa tehnologıasy patentteldi. 2022 jyly joba jetekshisi Rýslan Safarov áriptesterimen birge Ǵylym qorynyń grantyn jeńip aldy. Bul ǵylymı ázirlemeni komersıalandyrýǵa jáne óndiriske engizýge múmkindik beredi.
«Qazaqstanda marganes kenderiniń edáýir qory bar. Olardan boıaǵysh alýǵa bolady. Biz ǵylymı zertteý júrgizip, onyń qorytyndysy boıynsha trımarganes tetraoksıdin alýdiń tehnologıasyn taptyq. Onyń úlgisin saraptaý úshin Kókshetaý qalasyndaǵy kirpish zaýytyna tapsyrdyq. Mamandar bizdiń jasaǵan ónimniń sapasy jaqsy ekendigin rastady», - dedi EUÝ oqytýshy-zertteýshisi, hımıa ǵylymdarynyń kandıdaty Rýslan Safarov.
Ǵalym búginde baǵdarlamalaý tilin meńgerip, jańa daǵdylardy ǵylymı jumystarynda keńinen qoldanýda. Bul óz kezeginde zertteýlerdiń aıasyn keńeıtýge jol ashty.
«Geohımıalyq zertteýlerde biz neırondyq jelilerdi qoldana bastadyq. Hımıa, geologıa, IT qıylysyndaǵy ǵylymdardyń mundaı úılesimi jańa qyzyqty nátıjeler beredi, ıaǵnı obektilerdi ádettegi qaraý kezinde aıqyn emes zańdylyqtardy tabýǵa múmkindik jasaıdy. Men ózim baǵdarlamalaýmen, aqparattyq júıelerdi qurýmen aınalysamyn. Sondyqtan geohımıa men qorshaǵan orta obektilerin baqylaý salasynda mashınalyq oqytýdyń neırondyq jeliler jáne basqa tehnologıalary sıaqty kompúterlik modelderdi qoldaný baǵytyn ıgeremin. Bul zertteý aıasyn keńeıtýge kómektesedi», - deıdi R. Safarov.