Ulttyq bıotehnologıa ortalyǵynyń ǵalymy Vácheslav Ogaı baǵanaly jasýshalardy qoldaný arqyly kúrdeli synyqtardy qalpyna keltirýdiń biregeı tehnologıasyn jasap shyǵardy, dep habarlaıdy Almaty-akshamy.kz QR Bilim jáne ǵylym mınıstrliginiń baspasóz qyzmetine silteme jasap.
Arnaıy tehnologıanyń arqasynda operasıadan keıin 3-6 aı ishinde súıek jáne shemirshek tinderi qalpyna keledi. Klınıkaǵa deıingi synaqtardyń nátıjeleri preparattyń tıimdiligi joǵary ekenin rastady.
«Súıek aqaýlaryn tolyqtaı qalpyna keltirý travmatologıa men ortopedıadaǵy kúrdeli jáne sheshilmegen máselelerdiń biri bolyp qala beredi. Emdeý úshin súıek almastyrǵyshtaryn qoldana otyryp, osteoplastıkanyń ártúrli ádisteri jıi qoldanylady. Biraq bul operasıanyń nátıjesinde súıek árdaıym tolyq qalpyna kelmeıdi. Biz súıek aqaýlarynyń tolyq qalpyna kelýine yqpal etetin tehnologıany jasadyq. Baǵanaly jasýshalar men tabıǵı bıopolımerler zaqymdalǵan súıek nemese shemirshek tinderin qalpyna keltirý prosesin jedeldetedi», — dedi ázirleme avtory, Ulttyq bıotehnologıa ortalyǵynyń baǵanaly jasýshalar zerthanasynyń meńgerýshisi, profesor Vácheslav Ogaı.
Ǵalymnyń aıtýynsha, gıdrogelder súıek tinin jasaýda qańqa retinde qoldanylady. Qurylymynda olar dáneker tininiń negizine uqsas, sondyqtan barlyq bıomaterıaldar arasynda jasýsha transplantasıasy úshin eń qolaıly.
Qazir alǵashqy operasıalardy baǵanaly jasýshalar negizinde gıdrogel arqyly júrgizý josparlanyp jatyr. Kúrdeli synyqtar men zaqymdalǵan býyndardy qalpyna keltirýdiń biregeı tehnologıasy travmatologıa men ortopedıada kórsetiletin medısınalyq qyzmetterdiń deńgeıin aıtarlyqtaı arttyrady dep kútilýde. Preparat mamandandyrylǵan aýrýhanalar men ǵylymı medısınalyq ortalyqtarda qoldanylady.