37 qylmystyq is qozǵalǵan.
Beıbit sherýge qatysýshylardy azaptaǵan polıseılerdiń isimen ANTIKOR aınalysyp jatyr, dep habarlaıdy Almaty-akshamy.kz Turkystan.kz silteme jasap.
Qańtar oqıǵasy kezindegi búlikshilerdi anyqtap, jazalaý maqsatynda júrgizilip jatqan quqyqtyq sharalar barysynda asyra silteýge jol berilgeni belgili. Ustalǵandardy azaptaýǵa qatysty qozǵalǵan qylmystyq isti Sybaılas jemqorlyqqa qarsy qyzmeti Almaty oblystyq departamenti júrgizip jatqany belgili boldy. Vedomstvo bastyǵynyń orynbasary Dýlat Madıarovtyń aıtýynsha, búginde dál osy bap boıynsha 37 qylmystyq is qozǵalǵan.
«Kelip túsken jábirlenýshilerdiń ótinishterinde quqyq qorǵaý organdarynyń qyzmetkerleri tarapynan azaptaýǵa ushyraǵany jaıynda aıtylǵan. Iaǵnı, olardyń barlyǵynda qańtar oqıǵasyna qatysty qylmystyq isterdi tergeý kezinde azaptaýlar jasalǵany baıandalǵan. Polısıa jáne basqa da quqyq qorǵaý organdary qyzmetkerleriniń bul áreketterine jábirleýshilerdiń qorǵaýshylary, týystary, ata-analary ótinish bildirdi. Sonymen qatar, kún saıyn júrgiziletin qajetti tergeý áreketterine BAQ monıtorıńi jasalýda. Qazirgi ýaqytta tergeýdiń jan-jaqtylyǵyn qamtamasyz etý úshin birqatar tergeý amaldary júrgizilýde», – dedi Dýlat Madıarov.
Jalpy, Almaty oblysynda qańtar oqıǵasy boıynsha barlyǵy 409 qylmystyq is tergelýde, onyń ishinde 158 is urlyqqa, 191 is qarýdy zańsyz saqtaýǵa 11 is terorızmge, 3 is jappaı tártipsizdik jáne 3 is kisi óltirý babyna qatysty qozǵalǵan.
Búginge deıin osy ustalǵandardyń áreketine quqyqtyq baǵa berilip, 60-tan astam tulǵaǵa qatysty is jeńildetilgen. Olardyń denine qoǵamnan oqshaýlaý babynan tys túrli bultartpaý sharalary qoldanylyp otyr eken. Tergeý nátıjeleri boıynsha jazany jeńildetý maqsatynda 93 apelásıalyq ótinishhat engizilip, sot tarapy prokýrordyń aktilerin qanaǵattandyrypty. Nátıjesinde 71 adam qamaýdan bosatylyp, 22 adamǵa salynǵan aıyppul eskertýge aýystyryldy. Prokýratýranyń deregine sensek, qazir oblys aýmaǵynda ákimshilik is boıynsha qamaýda otyrǵan adamdar joq eken.