Qazaqstandyq rejıser Aıjan Qasymbektiń «Mádına» atty dramasy Alternativa Film Awards 2024 halyqaralyq kınojúldesiniń short-tizimine endi.
Marapattaý rásimi 29 qarashada Indonezıanyń Djokákarta qalasynda ótedi, dep habarlaıdy aqshamnews.kz El.kz aqparat agenttigine silteme jasap.
Alternativa Film Awards by inDrive – túrli elderdiń kınoındýstrıa mamandarynyń tanylýyna jáne ózara tájirıbe almasýyna múmkindik beretin halyqaralyq kóshpeli bastama. Bul júlde qoǵamǵa oń áleýmettik ózgerister ákele alatyn jáne kópshilik aýdıtorıaǵa arnalǵan fılmderdiń tanylýyna múmkindik beredi.
Short-tizimge Azıanyń 14 elinen jalpy sany 25 fılm endi. Onyń ishinde 13 tolyqmetrajdy jáne 12 qysqametrajdy týyndy bar. Ortalyq Azıanyń abyroıyn eki fılm qorǵap otyr: qazaqstandyq «Mádına» jáne qyrǵyz rejıseri Dalmıra Tilepbergenniń «Belek» fılmi.
Fılmdi túsirýge tórt jyl ýaqyt qajet boldy. Bizdiń túpki maqsatymyz – Qazaqstanda kóleńkede jıi qalyp qoıatyn áıelder men balalar máselesin kópshilikke jetkizý edi. Túsirilim basynda ózimdi dármensiz sezindim. Eshqandaı qoldaý bolmady, fılm eshkimge kerek emesteı kórindi, tipti fılm aıaqsyz qalyp qoıa ma dep qoryqtym. Biz qozǵaǵan taqyryptar qoǵamda áli kúnge deıin tabý sanalady. Biraq osy tórt jylda kóp nárse ózgerdi – Qazaqstannyń burynǵy ekonomıka mınıstri bolǵan kúıeýiniń qolynan qaıtys bolǵan Saltanat Núkenovanyń orny tolmas qazasy qoǵamdy turmystaǵy zorlyq-zombylyq týraly ashyq aıtýǵa ıtermeledi. Áıelder endi únsiz qala almaıdy, al Prezıdent bul máseleni jeńý úshin jańa zańdarǵa qol qoıdy. Bizdiń fılm – osy ózgerister týraly, mahabbatpen jáne únsiz qalýǵa bolmaıdy degen senimmen baıandalǵan oqıǵa, – deıdi rejıser Aıjan Qasymbek.
Halyqaralyq qazylar alqasynyń quramyna qazaqstandyq derekti fılm rejıseri Katerına Sývorova kirdi. Onyń «Qoryqpa» fılmi ótken jylǵy júldede marapatqa ıe bolǵan. Katerınamen birge fılmderdi Úndistan, Indonezıa, Germanıa, Brazılıa jáne Irannyń tanymal kınematografısteri baǵalaıdy.
Biz fılmderdiń kórkemdik jáne kınematografıalyq artyqshylyqtaryn ǵana emes, olardyń óz qaýymdastyqtaryna jetkizgisi kelgen mánin jáne osy keń de kúrdeli álemdegi barshamyzǵa berer áserin de eskerýimiz kerek. Ótken jylǵy festıvál baǵdarlamasynyń alǵashqy kezeńi meniń týǵan qalam Almatyda ótti. Bul men úshin jeńispen ǵana emes, qoǵamdy jaqsartýǵa baǵyttalǵan fılmderdi qoldaý ıdeıasymen este qalǵan jarqyn oqıǵa boldy. Kóshpeli júldeniń basqa elde qaıta jaryq kórip, jalǵasyn tapqanyn kórý maǵan shabyt syılaıdy, – dedi qazylar alqasynyń múshesi, qazaqstandyq rejıser Katerına Sývorova.
Short-tizimge engen barlyq fılm 22-28 qarasha aralyǵynda Djokákartada ótetin Alternativa Film Festival aıasynda kórsetiledi. Marapattaý rásimine deıingi mańyzdy oqıǵalardyń biri – 27-29 qarashada ótetin Industry Days kásibı baǵdarlamasy. Bul sharada kınematografıster ártúrli elderden kelgen áriptesterimen ózara tájirıbe almasady.
Marapattaý rásimin BUU-nyń genderlik teńdik máseleleri jónindegi elshisi, brıtan-ındonezıalyq aktrısa ári belsendi Hanna Al Rashıd júrgizedi.