Bul fılm Qazaqstanda 14 sáýirden bastap prokatqa shyqty.
Brazılıada ótken Olhar de Cinema halyqaralyq kınofestıvalinde rejıser Dárejan Ómirbaevtyń «Aqyn» fılmi «Basqa kózqarastar» bóliminde «Úzdik fılm» júldesin jeńip aldy, dep habarlaıdy Almaty-akshamy.kz
Festıváldiń «Basqa kózqarastar» bóliminde 10 elden nebári 8 fılm usynylǵan edi. Bul bólimde álemdik kınematografıanyń jańalyqtary men basqa festıválderde tanymal bolǵan fılmder kórsetildi.
«Aqyn» fılminiń Qazaqstannan sonaý alystaǵy Brazılıada, planetamyzdyń arǵy betinde kórsetilip, qabyldanyp jatqanyna óte qýanyshtymyn. Bul jeńis fılm túsirgende ózińe shynshyl bolsań, soǵan bar kúshińdi jumsasań, týyndyny bári túsinetinin taǵy bir dáleldeıdi. Búkil kıno tobyn osy baǵaly júldeni ıelenýimen quttyqtaımyn. Jańa jeńisterdi kútemiz, – dedi Dárejan Ómirbaev.
Sonymen qatar «Aqyn» fılmi Parıjdegi Jorj Pompıdý atyndaǵy zamanaýı óner mýzeıinde kórsetiledi. Onda Berlın kınofestıvaliniń úzdik fılmderi kórsetiletinini týraly fılmniń prodúseri Iýlıa Kım habarlady.
La Berlinale à Paris baǵdarlamasyn Berlınaleniń kórkemdik jetekshisi Karlo Chatrıan jáne Pompıdý murajaıynyń dıreksıasy qurastyrǵan. Shoýlar 10-26 maýsym aralyǵynda ótedi.
QR Mádenıet jáne sport mınıstrliginiń tapsyrysymen túsirilgen qazaq fılmi 18 maýsym kúni jergilikti ýaqyt boıynsha saǵat 17:00-de kórsetiledi.
Aıta keteıik, «Aqyn» fılmi Berlinale Forum halyqaralyq kınofestıvalinde júlde alǵan edi. Bul fılm Qazaqstanda 14 sáýirden bastap prokatqa shyqty. Sháken Aımanov atyndaǵy «Qazaqfılm» AQ túsirgen «Aqyn» fılmi tehnologıalar damyǵan qazirgi zamanda ónerdiń qoǵamda alatyn orny týraly oı qozǵap, poezıaǵa suranys azaıǵan dáýirde aqynnyń kúıinishi týraly syr shertedi.