Kompanıa úshin bul – damýdyń mańyzdy kezeńi
"Qazaqstan Injınırıń" UK" AQ men Serbıanyń "YUGOIMPORT-SDPR" kompanıasy ózara yntymaqtastyq týraly kelisimge qol qoıdy, dep habarlaıdy Almaty-akshamy.kz Indýstrıa jáne ınfraqurylymdyq damý mınıstrliginiń baspasóz qyzmetine silteme jasap.
«Qazaqstandyq ónimniń álemdik naryqqa shyǵýy bizge zor múmkindik beredi. Sonymen qatar suranystyń bolýy – qazaqstandyq ónimniń sheteldik óndirýshilermen básekege túse alatyndyǵynyń aıqyn kórsetkishi dep sanaımyn. Aldaǵy ýaqytta osy taraptaǵy áriptestigimizdi arttyra túsemiz», - dedi Indýstrıa jáne ınfraqurylymdyq damý mınıstri Qaıyrbek Óskenbaev basqosýda.
Sondaı-aq kelisim elder arasyndaǵy áskerı tehnıkalyq quraldardy birlese óndirý boıynsha birqatar ýaǵdalastyqtardy qamtıdy. Onyń ishinde, zamanaýı áskerı qarý-jaraq túrlerin shyǵarý, qorǵanys-ónerkásip kesheni salasyndaǵy eń jańa álemdik standarttar men praktıkalardy engizý kózdelgen. Aldaǵy ýaqytta Qazaqstan men Serbıa kásiporyndary 82 jáne 120 mm kalıbrli zymyran-artıllerıalyq oq-dáriler men mınometterdi birlese óndirmek.
«Bizdiń kompanıa úshin bul – damýdyń mańyzdy kezeńi. Sheteldik naryqtarǵa shyǵý – bizge ózimizdi tanytýǵa, óndiristi keńeıtýge, basqa elderdiń satyp alý áleýetin paıdalanýǵa jáne salany damytýǵa múmkindik beredi», - dedi "Qazaqstan Injınırıń" UK" AQ basqarma tóraǵasy Temirjan Ábdirahmanov.