Qazaqstandyq daryndar álem sahnalaryn baǵyndyrýda
Dombyrashylar Temirlan Oljabaı men Ernat Naýryz Ispanıada ótken «Music Box» halyqaralyq baıqaýynda úzdikter qatarynan kórindi. Jerlesterimiz «Aspaptyq mýzyka» nomınasıasynda jeńiske jetti, dep habarlaıdy Almaty-akshamy.kz
Bul topta 36 eldiń ónerpazdary bap pen baq synasyp kórdi. Qazaqstandyqtar birinshi kezeńde Nıkkolo Paganınıdiń «Kaprıs №24» týyndysyn avtorlyq óńdeýde oryndap, tóreshilerdi tańǵaldyrdy. Al ekinshi týrda dombyrashylar «Taqtar oıyny» telehıkaıasynyń saýndtregin oryndap, konkýrstyq beınerolık túsirdi. Sóıtip qatysýshylar arasynda eń joǵary upaıǵa ıe boldy.
Mýzykanttar mamyr aıynda Ispanıada ótetin oflaın festıválge joldama men belgili mýzyka sarapshylarynyń sheberlik sabaǵyna jeke qatysý múmkindigine ıe boldy.
Eske salsaq, Temirlan Oljabaı men Ernat Naýryz buǵan deıin «Úzdik aspaptyq dýet» nomınasıasy boıynsha «Bridge TV» júldesine ıe bolyp, «Golden Time Talent» halyqaralyq festıvalinde birinshi oryndy jeńip alǵan, sonymen qatar Ispanıada ótken «Costa Brava Music» festıvaline qatysqan.