Qazaqstandyq dızaıner álemdik brendtermen jumys isteıdi
Rýstam Sadyrov Qytaıda on jylǵa jýyq eńbek etip keledi. Qazaqstandyq dızaıner Beıjińdegi Qysqy Olımpıada oıyndarynyń brendıngin jáne kónkıshilerge arnalǵan medaldar men mereıtoılyq belgilerdi jasaýǵa atsalysty. Osy ýaqyt ishinde ol iri qytaılyq jáne halyqaralyq kompanıalarmen jumys istegen, dep habarlaıdy Almaty-akshamy.kz
«Olımpıada komıtetiniń brendıngi men dızaınynyń negizgi ıdeıasyn kýratorym, kompanıa dırektorymen birge ázirledim. Ózim jasaǵan aýqymdy jumystyń biri – osydan eki jyl buryn ótken Olımpıada kórmesiniń kireberis qaqpasy. Kóptegen nusqanyń ishinen meniki jeńip shyqty. Qaqpany muz álemine kirgendeı, erekshe sezim qaldyratyndaı etip jasadym. Birinshi oryndy, ıaǵnı altyn medaldy bir ǵana sportshy jeńe alady. Barlyq toptamadan biz bir altyn jasadyq», - dedi ınjener-ázirleýshi, dızaıner Rýstam Sadyrov.
Eńbek jolyn týǵan jerde bastaǵan Rýstam keıin Qytaıǵa baryp, sol eldiń úlken naryǵynda baǵyn synap kórýge bel býǵan. Jumys barysynda álemdik bedeli bar tehnologıalyq kompanıalarmen birigip jumys atqarǵan. Dızaınerdiń aıtýynsha, búginde avtomobıl jasaýdan basqa barlyq dızaın túrin oqyp, meńgerip alǵan. Endigi jospary – óz tájirıbesin Otanynda iske jaratý.
«Qytaıda ótken toǵyz jyl ishinde ómirim múldem basqa baǵytqa buryldy. Grafıkalyq, ónerkásiptik, kórmelik dızaındaǵy tájirıbemdi eskere otyryp, kóptegen tanymal brendpen jumys istedim. Ózimniń bilim-tájirıbemdi týǵan jerimde iske asyrsam deımin. Qazaqstanda talantty jastar óte kóp. Facebook-ta hat almasyp turamyz. Suraq-jaýaptar da kóp. Bir qyzyǵy, qazir jastar ózin-ózi damytýǵa kóp kóńil bóledi», - deıdi ınjener-ázirleýshi, dızaıner Rýstam Sadyrov.
Rýstam dızaın salasyndaǵy álemdik jańalyqtardy qalt jibermeı, olardy oqyp-zerttep, óz shyǵarmashylyǵynda keńinen qoldanady. «Álem únemi ózgeriste. Bilim – bul negizgi baza bolsa, al úzdiksiz ózin-ózi damytý – tabystyń kilti», – deıdi qazaqstandyq dızaıner.