Desanttyq-shabýyldaý áskerleriniń parashúttik komandasy Túrkıada ótetin «EFES-2024» halyqaralyq oqý-jattyǵýyna qatysýǵa daıyndalýda.
Jattyǵýlar Qonaev garnızonyndaǵy 32363 áskerı bóliminiń bazasynda 10 sáýir men 05 mamyr aralyǵynda «Ońtústik Jańa İle» sekirý alańynda ótkiziledi, dep habarlaıdy Almaty-akshamy.kz Qorǵanys mınıstrligine silteme jasap.
Parashút komandasynyń quramynda – 16 adam, onyń beseýi áskerı qyzmetshi áıelder.
Tájirıbelik sabaqtar barysynda qatysýshylar Mı-17 tikushaǵynan 2000 metr bıiktikten, sondaı-aq Sı-295 ushaǵynan «D 1,5Ý» parashút júıesimen jáne keıinnen «Insaıder 300 SF» parashút júıesimen 3000 metr bıiktikten sekiredi.
Sekirý kezinde sportshylar parashút ashylǵanǵa deıin durys erkin qulaýdy oryndaýy kerek, bul baǵdarlamanyń óte mańyzdy elementi. Túpki maqsat – 3500 metr bıiktikten sekirý, onyń 2000 metrine deıin parashútshy erkin qulaýdy oryndaıdy. Budan ózge jeke quramdy desanttaý úshin olarǵa ártúrli tıptegi parashútterdi oraý kýrsy ótkiziledi.
El namysyn qorǵaýshylar qatarynda efreıtor Baljan Musataeva da bar. 2013 jyly ol Qazaqstan armıasynyń qataryna shaqyrylǵan. Osy ýaqyt ishinde Baljan ár túrli parashút júıelerimen 120-dan asa parashútpen sekirgen.