Ulttyq qurama buǵan qosa 3 kúmis, 2 qola júldeni ıelendi.
Bokstan Qazaqstan quramasy Lıtvanyń Kaýnas qalasynda ótken Algırdas Shosıkas atyndaǵy halyqaralyq týrnırde 6 altyn medal jeńip aldy, dep habarlaıdy Almaty-akshamy.kz
Qazaqstan boks federasıasynyń habarlaýynsha, 57 kelige deıingi salmaqta Asyljan Serikbaı ýkraınalyq Denıs Rozdolskıdi eki ret nokdaýnǵa jiberip, aıqyn basymdyqpen jeńdi.
Jandos Qydyrálıev (63, 5 kg) ırlandıalyq Paýl Heıl Djonnyń jekpe-jekten bas tartýyna baılanysty taǵy bir altyn medaldy ıelendi.
67 keli salmaqta Elnur Súıinbaı Polsha ókili Kırıll Globenkodan basym tústi. Farýh Toqtasynov (71 kg) sońǵy jekpe-jeginde ýkraınalyq Maksım Molodanny jeńse, Azamat Bektas (75 kg) taǵy bir Polsha ókili Mıhal Iarlınskıden aılasyn asyrdy.
80 keli salmaqta Tursynbaı Qulahmet ulybrıtanıalyq Ramtın Mýsany jeńdi.
Nursultan Altynbek (54 kg), Almat Ábdýálı (60 kg) pen Abzal Quttybekov (86 kg) tóreshiler sheshimimen qarsylastarynan jeńilip, ekinshi oryndy aldy.
51 keli salmaqta Danıal Sábıt pen aýyr salmaqtaǵy Amanat Sabyrǵalı qola júldege ıe boldy. Osylaısha, boksshylar halyqaralyq týrnırde 6 altyn, 3 kúmis, 2 qola medaldi ıelendi.
Al Ázerbaıjannyń astanasy – Baký qalasynda «Uly jibek joly» dástúrli halyqaralyq týrnır bastalady. Oǵan 11 elden 121 boksshy qatysady.
Qazaqstan jáne Ázerbaıjan quramasynan bólek, týrnırde Ózbekstan, Reseı, Polsha, Qyrgyzstan, Tájikstan, Iran, Italıa, Pákistan men Vengrıa boksshylary da baq synaıdy..
Keshe týrnırdiń jerebe tartý rásimi bolyp, boksshylardyń alǵashqy qarsylastary anyqtaldy.
Búgin «Uly jibek joly» halyqaralyq týrnırinde Qazaqstan quramasynan sharshy alańǵa alty boksshy shyǵady.
Olardyń ekeýi týrnırdi 1\8 fınaldan bastasa, tórteýi shırek fınaldyq jekpe-jekterin ótkizedi.
Asa aýyr salmaqtaǵy Qamshybek Qońqabaev reseılik Ramazan Karkýkaevpen kezdesetin boldy. Eger Qońqabaev qarsylasyn jeńse, shırek fınalda Ózbekstannyń alyby Bahodır Jalolovpen qolǵa túıistiredi.