Qazaqstan Qorǵanys mınıstrliginiń delegasıasy Kenıa astanasy Naırobıde ótken Halyqaralyq bitimgerlik daıyndyq ortalyqtary qaýymdastyǵynyń (IAPTC) 27-shi konferensıasyna qatysty.
Halyqaralyq beıbitshilikti qoldaý oqý ortalyǵynda 80 memleketten bitimgerlik daıyndyq ortalyqtary men halyqaralyq uıymdardyń 300-den asa ókili jınaldy, dep habarlaıdy Almaty-akshamy.kz QR Qorǵanys mınıstrligine silteme jasap.
Konferensıa delegattary kúrdeli bitimgerlik operasıalarǵa bitimgerlerdi daıyndaýdaǵy seriktestiktiń rólin talqylady.
«Konferensıaǵa qatysý bitimgerlik qyzmet salasyndaǵy aǵymdaǵy úrdistermen jáne talaptarmen tanysýǵa, jańa baılanystar ornatýǵa múmkindik berdi. Qoldaǵy bar málimetterdi eskere otyryp, biz ulttyq bitimgerlik kontıngentin daıarlaý baǵdarlamasyn ýaqtyly beıimdeı alamyz», – dedi Bitimgerlik daıyndyq ortalyǵynyń bastyǵy polkovnık Baýyrjan Nyǵmetýllın.
Bul shara birinshi kezekte bitimgerlik áleýetti arttyrýǵa, halyqaralyq uıymdardyń, úkimetterdiń jáne tótenshe jaǵdaılarǵa den qoıý tıimdiligin arttyrýǵa múddeli jergilikti bılik ókilderiniń strategıalyq yntymaqtastyǵyn baǵalaýǵa jáne ony damytýǵa baǵyttalǵan.
Bitimgerlik daıyndyq ortalyqtarynyń halyqaralyq qaýymdastyǵy 1995 jyly qurylǵanyn aıta ketý kerek. Trenıńter, bilim berý baǵdarlamalary men zertteý bastamalarynyń arqasynda búkil álemniń bitimgerlik daıarlaý ortalyqtary 190 elden 50 myńnan astam bitimgerdi sátti daıyndady.