Ásirese, áskerge shaqyrý naýqany erekshe nazarǵa alynyp otyr.
Kúzgi shaqyrý naýqany bastalysymen, Qorǵanys mınıstriniń tapsyrmasy boıynsha qorǵanys vedomstvosynyń aqparattyq-túsindirý toby el óńirlerinde jumysqa kiristi, dep habarlaıdy Almaty-akshamy.kz.
«Bul jumystyń basty baǵyttary – Prezıdenttiń Joldaýyn túsindirý, halyq arasynda áskerı qyzmetti nasıhattaý, sondaı-aq «Birtutas ult – birtutas ásker» jastardy áskerı-patrıottyq tárbıeleý baǵdarlamasyn iske asyrý», - delingen Qorǵanys mınıstrliginiń baspasóz qyzmetiniń habarlamasynda.
Aqparattyq-túsindirý toby jumysyn Semeı jáne Óskemen óńirlerinen bastady. Oblys ortalyqtarynda bul qyzmetke jergilikti atqarýshy organdar men qoǵam, «Ana júregi» sarbazdar analary birlestiginiń ókilderi, Qarýly Kúshterdiń ardagerleri jáne «Jas sarbaz» respýblıkalyq áskerı-patrıottyq qozǵalysynyń belsendileri tartyldy.
Qorǵanys vedomstvosynyń ókilderi áskerı qyzmetshilermen, áskerge shaqyrylatyn jáne shaqyrý jasyna deıingi jastarmen kezdesý barysynda Memleket basshysynyń «Ádiletti memleket. Birtutas ult. Berekeli qoǵam» halyqqa joldaýynyń erejelerin túsindirdi. Prezıdent aıtqan basty tezıster atap ótilip, olardyń eldiń qarqyndy damýyna jáne qazaqstandyqtardyń ál-aýqatyn arttyrýǵa negiz bolatyny alǵa tartyldy.
Ásirese, áskerge shaqyrý naýqany erekshe nazarǵa alynyp otyr. Qorǵanys mınıstrliginiń áskerı qyzmetshileri merzimdi áskerı qyzmet ótkerýdiń erekshelikteri, áskerı qyzmetshiler men olardyń otbasy músheleri úshin áleýmettik kepildikter týraly aıtyp, áskerge shaqyrylýshylar men olardyń ata-analarynyń suraqtaryna jaýap berdi.
Sonymen qatar Semeı men Óskemende qorǵanys vedomstvosy Abaı jáne Shyǵys Qazaqstan oblystarynan shaqyrylǵan, búginde elimizdiń túrli óńirlerinde qyzmet etip jatqan merzimdi qyzmettegi úzdik áskerı qyzmetshilerdiń ata-analaryn saltanatty marapattaý rásimin uıymdastyrdy. Ata-analarǵa Otan qorǵaıtyn laıyqty uldar tárbıelegeni úshin alǵys aıtyldy, al bolashaq jaýyngerlerge ata-anasynyń jáne jerlesteriniń maqtanyshy bolyńdar degen tilekter bildirildi.
Odan bólek «Birtutas ult – birtutas ásker» jastardy áskerı-patrıottyq tárbıeleý baǵdarlamasyn iske asyrý sheńberinde jalpy bilim beretin mektepterde Qarýly kúshterdiń ardagerleri men áskerı qyzmetshilerdiń qatysýymen erlik sabaqtary ótkizilip, óskeleń urpaqty áskerı oqý oryndaryna túsý tártibimen tanystyrý uıymdastyryldy. Sondaı-aq oqýshylarǵa arnap Qarýly Kúshter týraly derekti fılmder jáne áskerı joǵary oqý oryndary jaıly beınerolıkter kórsetildi.
«El Prezıdenti óz Joldaýynda egemendik pen aýmaqtyq tutastyqty saqtaý asa mańyzdy mindet dep atap ótken bolatyn. Al memleketti nyǵaıtý úshin bizge birlik qajet. Jastarmen qarym-qatynas barysynda óskeleń urpaqtyń Ádiletti Qazaqstandy qurýǵa qanshalyqty múddeli ekenin, Otandy qorǵaýdy qaı deńgeıde túsinetinin baıqaýǵa bolady. Sondyqtan bizdiń aqparattyq-túsindirý tobymyzdyń jumysy qajet dep sanaımyn», – dedi Qorǵanys mınıstrligi Tárbıe jáne ıdeologıalyq jumystar departamentiniń bastyǵy, general-maıor Serik Borambaev.
Aqparattyq-túsindirý tobynyń jumysy Ulttyq áskerı-patrıottyq ortalyǵynyń bastyǵy Qazaqstannyń eńbek sińirgen qaıratkeri Arman Asenovtyń basshylyǵymen uıymdastyrylǵan Qarýly Kúshter Ortalyq ansambliniń konsertimen aıaqtaldy.
