Kýrstyń ashylý saltanatyna «BUU – Áıelder» ókili Marıa Dosenko qatysty
Almatyda QR QM Bitimgerlik operasıalar ortalyǵy Ulybrıtanıanyń Qazaqstan Respýblıkasyndaǵy Elshiligimen birlesip, «Adam qaýipsizdigi jáne genderlik máseleler jónindegi keńesshi» kýrsyn ótkizdi, dep habarlaıdy Almaty-akshamy.kz.
Kýrsqa Qarýly Kúshterdiń, Ulttyq ulannyń, sondaı-aq Ortalyq Azıa óńiriniń basqa da kúshtik vedomstvolarynyń ókilderi jınaldy. Kýrstyń ashylý saltanatyna «BUU – Áıelder» ókili Marıa Dosenko qatysty. Sondaı-aq Qazaqstan Respýblıkasyndaǵy Ulybrıtanıanyń áskerı attashesi, podpolkovnık Rob Bakster men «Qorǵaý-Astana» jeke qorynyń basshysy Anna Ryl dáris oqydy.
İs-shara barysynda QR QM Bitimgerlik operasıalar ortalyǵy bitimgerlik daıyndyq basqarmasynyń ofıser-oqytýshylary sabaq júrgizdi. Kýrstyń maqsaty BUU-nyń «Áıelder, beıbitshilik jáne qaýipsizdik» qararynyń normalaryn zertteıtin jáne qoldanatyn mamandardy daıarlaý, qatysýshylardy azamattyq halyqty qorǵaý quqyǵymen jáne tujyrymdamasymen tanystyrý boldy.
Oqý aptasynyń negizgi bóligi tyńdaýshylardy tıisti basshylyq qujattarmen, atap aıtqanda, BUU-nyń beıbitshilikti qoldaý operasıalaryndaǵy halyqtyń osal toptaryn qorǵaý tujyrymdamasy men strategıasymen, áskerı sheshim qabyldaý prosesinde adam qaýipsizdigi jáne genderlik máseleler jónindegi keńesshiniń rólimen tanystyrýǵa baǵyttaldy. Qarýly qaqtyǵys jaǵdaıynda balalardy qorǵaý, Úkimettik emes uıymdarmen jáne BUU-nyń aımaqtyq keńselerimen úılestirý jumystaryna erekshe nazar aýdaryldy.
Kýrs sońynda qatysýshylarǵa buryn zerttelgen modelder negizinde adam qaýipsizdigi jáne genderlik aspektiler jónindegi keńesshiniń kózqarasy boıynsha jedel jaǵdaıdy taldaýǵa arnalǵan baıandama daıyndaýǵa ýaqyt berildi. Kýrs suraq-jaýap sesıasy túrindegi qorytyndylarmen aıaqtalyp, sholýlarǵa qysqasha taldaý jasaldy. Sharanyń jabylý saltanatynda qatysýshylarǵa sertıfıkattar tabystaldy.