"Áıelder áıelderge" áleýmettik jobasy
"Áıelder áıelderge" áleýmettik jobasy 2023 jyly Almaty qalasynda bastaý aldy. Bul joba aıasynda 22 erekshe balanyń anasy jeke kásip ashýǵa tegin kómek aldy. Sodan soń joba respýblıkalyq deńgeıge jetip, qazir ol tek Almaty qalasynda emes, sondaı-aq Astana, Shymkent, Óskemen, Qostanaı qalalarynda da ótedi.
Jobanyń maqsaty - erekshe balalardyń analaryna kómektesý. Olarǵa óz isin/bıznesin ashýdy úıretý jáne jumysqa ornalastyrý. Áleýmettik joba QR Prezıdenti janyndaǵy áıel isi jáne otbasy-demografıalyq saıasatynyń ulttyq komısıasynyń jáne QR Mádenıet jáne aqparat mınıstrliginiń qoldaýymen júzege asady.
Joba qalaı iske asyrylady?
jobaǵa qatysýshylardy irikteý, olarǵa kásipkerlik negizderdi úıretý, psıhologıalyq qoldaý - MamaPro QB;
3 aı boıy mentor bolý - ADJK, EQDB, "Atameken" ulttyq palatasy;
bıznes ıeleriniń master-klastary jáne zańger keńesteri - ADJK;
suranys bolsa, psıhologıalyq qoldaý - ADJK;
koýchıng - ICF Kazakhstan halyqaralyq koýchtar qory;
bıznesti qoldaý jónindegi memlekettik baǵdarlamalarǵa qatysý múmkindikteri boıynsha konsýltasıalar - memlekettik organdar.
IT-Aiel jobasy
Astana Hub Qazaqstan Respýblıkasy Prezıdenti janyndaǵy Áıelder isteri jáne otbasylyq-demografıalyq saıasat jónindegi ulttyq komısıamen birlesip, IT salasynda jumys istegisi keletin áıelderdi oqytady.
Jobanyń maqsaty - áıelderdiń ekonomıkalyq múmkindikterin keńeıtý jáne nátıjeli jumyspen qamtýǵa tartý, olardyń tabysyn arttyrýǵa jaǵdaı jasaý, áıelderdiń sıfrlyq quzyretin damytý.
18 jastan asqan jumyssyz jáne dekrettik demalystaǵy áıelder IT-Aiel baǵdarlamasyna qatysýǵa ótinish berip, No Code School, Freelance School, sondaı-aq negizgi kompúterlik saýattylyq kýrstary boıynsha oqı alady. Qatysýshylar jańa isti onlaın formatta qazaq jáne orys tilderinde ıgere alady. Baǵdarlama qyzyqty vebınarlar, vorkshoptar, tikeleı efırler, Q&A-sessıalary jáne t.b. turady.
IT-Aiel jobasynyń iske asyrylýyna qatysty aqparatty @astanahub/@technowomenkz akkaýnttarynan taba alasyz.
Tomiris bilim berý jobasy
Tomiris baǵdarlamasy Qazaqstan Respýblıkasy Prezıdenti janyndaǵy Áıelder isteri jáne otbasylyq-demografıalyq saıasat jónindegi ulttyq komısıasynyń jáne "Amanat" partıasynyń Saıası menedjment akademıasynyń qoldaýymen ótkiziledi. Joba qyz-kelinshekterdiń eldiń saıası-ekonomıkalyq ómirine aralasýyna jol ashady.
Bul baǵdarlama boıynsha 30 áıel bilim alady. Áıelder jobaǵa konkýrstyq komısıanyń irikteýinen ótedi. Qyz-kelinshekter kópshilik aldynda sóıleýdi, qarym-qatynas ornatýdy, emosıonaldy ıntellektini damytýdy jáne jobalardy basqarýdy úırenedi. Oqý baǵdarlamasy 5 kúnge sozylady.
"Mıkrobıznestegi áıelder" jobasy
"Mıkrobıznestegi áıelder" - QR Úkimetiniń qarjylyq qoldaýymen "Damý" qorynyń seriktesi – EQDB uıymdastyrǵan tegin bilim berý jobasy.
Joba maqsaty:
Bıznesti masshtabtaý jáne ony kelesi deńgeıge kóterý;
Zamanaýı basqarý quraldaryn meńgerý;
Seriktestik jelini keńeıtý jáne pikirles adamdar tabý;
Jumys tobyn kúsheıtý;
İskerlik oılaýdy damytý;
Myqty jáne senimdi kóshbasshy bolýdy úırený.
Oqytý baǵdarlamasy bıznestiń barlyq salalaryn qamtıdy jáne qazaq jáne orys tilderinde ótedi.
Jobaǵa 15 adamnan aspaıtyn qyzmetkeri bar mıkrobıznes ıesi qatysa alady. Bıznesińizdiń jyldyq aınalymy jylyna 100 mln teńgeden aspaýy kerek. Jobaǵa bank nemese qarjy qyzmetteri, áskerı ónimder/qyzmetter, oıyn jáne temeki óndirisi salalaryndaǵy kompanıalar qatysa almaıdy.
Kópbalaly analarǵa arnalǵan jeńildikter
Elimizde 4 jáne odan da kóp kámelet jasyna tolmaǵan balasy bar otbasylar birden kópbalalylar sanatyna jatqyzylady. Alty bala týǵan kópbalaly analarǵa "Kúmis alqa", al jeti ne odan kóp bala týǵan kópbalaly analarǵa "Altyn alqa" beriledi.
Áleýmettik baspana
"Altyn alqa", "Kúmis alqa" alqalarymen marapattalǵan nemese buryn "Batyr ana" ataǵyn alǵan, İ jáne İİ dárejeli "Ana dańqy" ordenderimen marapattalǵan kópbalaly analar turǵyn úıdi memlekettik turǵyn úı qorynan alýǵa nemese jergilikti atqarýshy organ jeke turǵyn úı qorynan jaldaǵan turǵyn úıdi alýǵa birinshi kezekte quqyly. Iaǵnı kópbalaly analar turǵyn úı kezegine turyp, baspana ala alady.
Salyq jeńildigi
"Altyn alqa" alqasymen marapattalǵan jáne "Batyr ana" ataǵyna ıe bolǵan kópbalaly analar turǵyn úı qory ıelengen jer ýchaskeleri, onyń ishinde onyń janyndaǵy qurylystar, úı janyndaǵy jer ýchaskeleri boıynsha salyqtan bosatylady.
Sondaı-aq "Batyr ana", "Altyn alqa" ne "Kúmis alqamen" nagradtalǵan kópbalaly analar bir kóliktiń salyǵyn tóleýden bosatylady. Olar notarıaldyq qyzmetterge júgingende memlekettik baj salyǵyn tólemeıdi.
Qoǵamdyq kólikte tegin júrý
2023 jyldyń 1 naýryzynan bastap "Avtomobıl kóligi týraly" zańǵa ózgerister engizildi. Zańǵa sáıkes "Altyn alqa", "Kúmis alqa" alqalarymen nagradtalǵan nemese buryn "Batyr ana" ataǵyn alǵan, sondaı-aq I jáne II dárejeli "Ana dańqy" ordenderimen nagradtalǵan kópbalaly analardyń tegin jol júrýge quqyǵy bar.
Zeınetke erte shyǵý
Qazirgi zańnamaǵa sáıkes erler úshin zeınetke shyǵý jasy - 63 jas, áıelder úshin - 60 jas dep belgilengen. Al 5 jáne odan da kóp bala týǵan (asyrap alǵan) jáne olardy 8 jasqa deıin tárbıelegen áıelderdiń 53 jasqa tolǵanda jasyna baılanysty zeınetaqy tólemderin alýǵa quqyǵy bar.
Jalǵyzbasty analarǵa qandaı kómekter qarastyrylǵan?
Jalǵyzbasty ana - zańdy nekege turmaı, dúnıege sábı ákelgen áıel jáne olarǵa alıment tólenbeıdi. Al kúıeýimen ajyrasqan nemese joldasy qaıtys bolǵan, balalary bar analar tolyq emes otbasy sanatyna kiredi. Jalǵyzbasty analarǵa jáne tolyq emes otbasy sanatyndaǵy otbasylarǵa memleket tarapynan mynadaı jeńildik túrleri qarastyrylǵan:
Jalǵyzbasty analar halyqtyń áleýmettik jaǵynan álsiz top múshesi retinde memlekettik turǵyn úı qorynan turǵyn úı kezegine tura alady.
Jalǵyzbasty analar bala týýyna baılanysty taǵaıyndalatyn birjolǵy memlekettik járdemaqy, bala bir jasqa tolǵanǵa deıin onyń kútimine baılanysty tólenetin aı saıynǵy memlekettik járdemaqy ala alady.
Jalǵyzbasty ana kópbalaly ana bolsa, balabaqsha kezegin erterek alýyna bolady.