Bıyl Parıjde ótken Olımpıadadaǵy jeti medaldiń tórteýin Armıa ortalyq sport klýbynyń ókilderi enshilegen bolatyn.
Qorǵanys mınıstri Rýslan Jaqsylyqov armıa sportshylaryn marapattady, dep habarlaıdy aqshamnews.kz
Bıyl armıa sportshylary Ǵusman Qyrǵyzbaev, Islam Sátbaev, Demeý Jadyraev jáne Narıman Qurbanov elimizdi álemge áıgili etti.
General-polkovnık Rýslan Jaqsylyqov CISM halyqaralyq áskerı-sporttyq uıymymen baılanystyń qaıta jandanýyn oń baǵalap, kelesi jyly ol basqarmadan bizge bir oryn beriletinin málimdedi.
"Eki jyl qatarynan áskerı qyzmetshilerimiz respýblıkalyq «Qazaqstan barysy» týrnırinde jeńiske jetti. Kelesi jyly AOSK sheńberinde biz osy sport túrinen álem chempıonatyn ótkizemiz. Oǵan qosa, Joǵarǵy Bas qolbasshy áskerı sport kolejin qurý týraly sheshimimizdi qoldady. Bul Qarýly Kúshter úshin de, memleketimiz úshin de sportty damytýdyń taǵy bir qadamy. Jastardyń laıyqty bilim alýy jáne bolashaqta sportta joǵary jetistikterge jetip, óz áleýetin iske asyrýy úshin jaǵdaı jasaımyz", – dep atap ótti mınıstr.
Qorǵanys vedomstvosynyń basshysy AOSK basshylyǵynyń aldyna birqatar mindet qoıdy. Olardyń qatarynda qazaq kúresi, sambo, jaýyngerlik sambo jáne regbıdi damytý da bar. General-polkovnık Rýslan Jaqsylyqov budan bólek Uly Otan soǵysyndaǵy Jeńistiń 80 jyldyǵyna jáne Keńes Odaǵynyń Batyry Álıa Moldaǵulovanyń týǵanyna 100 jyl tolýyna arnalǵan sporttyq is-sharalardy sapaly uıymdastyrý qajettigine de toqtaldy.
Kezdesý sońynda Qorǵanys mınıstri AOSK sportshylaryn, komanda bastyqtaryn, jattyqtyrýshylar men sport rotasynyń áskerı qyzmetshilerin marapattady. «El qorǵany» medali aǵa leıtenant Marat Baıqamurovqa, Qarýly Kúshterdiń qyzmetkeri Narıman Qurbanovqa, efreıtor Nurqoja Qaıpanovqa, kishi serjant Jámıla Baqbergenovaǵa jáne kapıtan Zámzágúl Faızolanovaǵa tabystaldy. «Qazaqstan Respýblıkasy Qarýly Kúshteriniń úzdigi» belgisine qatardaǵy jaýyngerler Asan Sálimov, Abdýlla Mýsın, Álimhan Syzdyqov, efreıtor Meıirjan Áshirov jáne Qarýly Kúshterdiń qyzmetkeri Kamıl Kýrýglıev ıe boldy. Qarýly Kúshterdiń qyzmetkeri Angelına Lýkas mınıstrdiń gramotasyn aldy, al ataýly saǵattar – podpolkovnık Atahan Nurıdınovke, leıtenant Asan Mámbetqulovqa, kapıtan Ǵumar Qyrǵyzbaevqa, Qarýly Kúshterdiń qyzmetkerleri Kamal Gadjımagomedovke pen Nurym Dúısenovke berildi.
Oqý-ádistemelik jıyn aıasynda Qarýly Kúshter túrleriniń, ásker tekteri men joǵary oqý oryndarynyń dene shynyqtyrý daıarlyǵy jáne sport mamandarynyń qyzmetiniń qorytyndysy shyǵaryldy.