Birlesken joba ázirlendi
QR Premer-Mınıstri Álıhan Smaıylov Dúnıejúzilik banktiń Ortalyq Azıa boıynsha óńirlik dırektory Tatána Proskýrákovamen kezdesý ótkizdi, dep habarlaıdy Almaty-akshamy.kz Úkimettiń resmı saıtyna silteme jasap.
Taraptar Dúnıejúzilik bank tarapynan Qazaqstandaǵy damý reformalaryn qoldaý sharalaryn talqylady. Osy jumys aıasynda naqty qadamdardyń tizimin qamtıtyn birlesken joba ázirlendi.
Jobany iske asyrý telekomýnıkasıa sektorynda naryqtyq básekelestikti kúsheıtýdi, sıfrlyq tehnologıalar sektorynyń tutastyǵyn arttyrýdy jáne sıfrlyq ekonomıkany damytýdy qoldaýdy kózdeıdi.
Budan basqa, memlekettik satyp alýlardaǵy básekelestikti jáne ashyqtyqty jetildirý, bank sektorynyń jumysyn jaqsartý, sybaılas jemqorlyqqa qarsy kúres jónindegi sharalardy kúsheıtý, aglomerasıalardy damytý, sondaı-aq ekologıalyq jáne tıimdi energıany óndirý boıynsha sharalar qarastyrylǵan.
«Qazirgi jaǵdaıda bul joba Qazaqstan úshin óte mańyzdy. Ol daǵdarysqa qarsy qabyldanyp jatqan sharalarǵa jáne elimizdiń jańa ekonomıkalyq baǵytyn iske asyrýǵa qoldaý kórsetýdi qamtamasyz etedi», — dedi Álıhan Smaıylov.
Óz kezeginde Tatána Proskýrákova Dúnıejúzilik bank Qazaqstandy senimdi seriktes retinde qabyldaıtynyn, sondyqtan ózara tıimdi yntymaqtastyqty jalǵastyrýǵa daıyn ekenin atap ótti.
«Biz Qazaqstan Úkimetiniń alǵa qoıǵan maqsattarǵa qol jetkizýine múddelimiz. Meniń oıymsha, kóptegen baǵyttar boıynsha úlken perspektıvalar bar», — dedi Tatána Proskýrákova.
Kezdesýdi qorytyndylaı kele, Úkimet basshysy Ulttyq ekonomıka mınıstrligine múddeli memlekettik organdarmen birlesip, reformalar matrısasyn kelisýdi jandandyrýdy tapsyrdy.