Búdjetti josparlaý kezinde de monıtorıń jasalmaq
Qarjy mınıstrligi memlekettik qoldaý sharalaryna bólingen qarajatqa monıtorıń júrgizedi, dep habarlaıdy Almaty-akshamy.kz Almaty.tv-ge silteme jasap.
Qazirdiń ózinde 2015-2021 jyldar aralyǵyndaǵy kezeńde kórsetilgen 80 memlekettik qoldaý sharasy boıynsha málimetter jınalǵan eken. Sonymen qatar osy aqparattardy avtomatty túrde alý maqsatynda memlekettik qoldaý sharalaryn atqaratyn 7 operatordyń aqparattyq júıesimen ıntegrasıa jumysy iske asyryldy. Mundaı monıtorıń júrgizý tásilderi búdjetti josparlaý kezinde de qoldanylmaq. Sondaı-aq memlekettik apparat qyzmetin búrokratıadan aryltý úshin býhgalterlik operasıanyń biryńǵaı bazasy qurylǵan.
«Jobada biryńǵaı anyqtamalyqty paıdalaný da josparlanyp otyr. Bul taldamalyq quraldy ornatýǵa jáne qarjy salasyndaǵy ártúrli prosesterdiń, ıaǵnı býhgalterlik esepti júrgizý, eseptilik berý, búdjetti josparlaý jáne pármendi memlekettik aýdıttiń tıimdiligin arttyrýǵa múmkindik beredi», – dedi QR Qarjy mınıstrligi sıfrlandyrý jáne memlekettik qyzmetter departamentiniń dırektory Erkin Berkeshev.