Osy maqsatta jobalyq komanda quryldy.
Qazaqstandyq mamandar barlyq jol jobalaryna halyqaralyq standarttardy engizý jumysyn júrgizip jatyr, dep habarlaıdy Almaty-akshamy.kz.
«Bul rette QR IIDM Avtomobıl joldary komıtetinde barlyq jol jobalaryna halyqaralyq standarttardy engizý jumysy júrgizilip keledi. Qazirgi ýaqytta QM jáne UEM ókilderimen jobalyq komanda quryldy. Jumys toby qoldanystaǵy búdjet zańnamasyna ózgerister engizý boıynsha usynystar ázirleýi tıis»,- delingen Indýstrıa jáne ınfraqurylymdyq damý mınıstrliginiń baspasóz qyzmetiniń habarlamasynda.
Úkimettiń keńeıtilgen otyrysynda sóılegen sózinde Memleket basshysy Qasym-Jomart Toqaev Qazaqstanǵa avtojol salasyna FIDIC halyqaralyq qaǵıdattaryn engizý qajettigin atap ótti.
«Bul júıe jol salasyn tıimdi basqarýǵa, búdjet qarajatyn utymdy paıdalanyp, barlyq deńgeıdegi jemqorlyq qaýpin azaıtýǵa múmkindik bermek», - dep jetkizdi Prezıdent.
Halyqaralyq jobalardy iske asyrýmen aınalysatyn mamandar, halyqaralyq bank qyzmetkerleri men zańgerler úshin FIDIC uǵymy kúndelikti jumystyń quraly bolyp tabylady. Alaıda, FIDIC abrevıatýrasynyń maǵynasyn jete túsinetin mamandar áli de tapshylyq.
Osyǵan oraı «Balqash-Býrylbaıtal» avtojoly ýchaskesi jobasynyń jetekshisi Pak Chýn Sýn myrzamen áńgimelestik. Onyń aıtýynsha, FIDIC aıasyndaǵy kelisimsharttar halyqaralyq qarjy ınstıtýttary tarapynan jobalardy qarjylandyrýda qoldanylady. Mysaly, Dúnıejúzilik, Azıalyq nemese Eýropalyq bankteri.
«FIDIC-te taraptardyń kelisim-sharttar boıynsha ózara qarym-qatynastary egjeı-tegjeıli kórsetilgen. Talap paıda bolǵan jaǵdaıda qandaı shara qoldaný kerektigi jiti aıtylǵan. Táýekelder men syıaqylardy ádil úlestirý búge-shúgesine deıin jazylǵan, árbir tarmaq eskerilgen», - dep jetkizdi Pak Chýn Sýn.
Aıta keterligi, Halyqaralyq ınjener-konsýltanttar federasıasy nemese qysqasha FIDIC 1913 jyly qurylǵan bolatyn. Búgingi tańda jahandyq organ álemniń 100-den astam elinde bar. Óz qyzmetterin bir mıllıonnan astam ınjenerlik maman men 40 myńǵa jýyq fırma usynýda.
Sondaı-aq, Pak myrza halyqaralyq tájirıbemen bólisti: «Koreıada ınjener-konsýltanttar qaýymdastyǵy FIDIC boıynsha arnaıy bilim berý baǵdarlamalaryn daıyndaıdy. Ádette ınjenerlik kompanıalar jumys berýshiler mamandardy oqytýǵa aqy tóleıdi. Baǵdarlama úsh aıǵa sozylady, sodan keıin sertıfıkattar men dıplomdar beriledi. Biraq FIDIC-ke ózgerister men tolyqtyrýlar engizilgendikten, siz únemi oqyp, bilimińizdi jańartyp, jetildirip otyrýyńyz kerek».
Búgingi tańda FIDIC kelisimsharttary boıynsha Qazaqstanda birqatar avtojol jobalary iske asyrylýda. Atap aıtsa, «Balqash - Býrylbaıtal - Kúrti - Qapshaǵaı», «Qandyaǵash - Maqat» jáne «Atyraý –Astrahan - RF shekarasy» jobalary.
Bul rette QR IIDM Avtomobıl joldary komıtetinde barlyq jol jobalaryna halyqaralyq standarttardy engizý jumysy júrgizilip keledi. Qazirgi ýaqytta QM jáne UEM ókilderimen jobalyq komanda quryldy. Jumys toby qoldanystaǵy búdjet zańnamasyna ózgerister engizý boıynsha usynystar ázirleýi tıis.