Aǵa leıtenant Ardana Botaı Sý-30SM kóp fýnksıonaldy joıǵyshynyń ekıpaj komandıri retinde alǵashqy jeke ushýyn oryndady.
Qazaqstandaǵy áskerı avıasıanyń jalǵyz áıel ushqyshy ekıpaj komandıri atandy, dep habarlaıdy Almaty-akshamy.kz.
Óz sheberligin Ardana Botaı tájirıbelik emtıhan barysynda dáleldegen. Qorǵanys mınıstrliginiń málimeti boıynsha, QR QK Áýe qorǵanysy kúshteriniń bas qolbasshysy, avıasıa general-leıtenanty Nurlan Ormanbetov derbes ushýǵa ruqsat beretin praktıkalyq emtıhandy qabyldaǵan.
«Qazaqstan Respýblıkasy Qarýly Kúshteriniń tarıhynda Sý-30SM jaýyngerlik ushaǵynda ekıpaj komandıri retinde derbes ushýdy alǵash ret áıel adam oryndady. Onyń buǵan jaqsy daıyndalǵanyn, kók aspandy baǵyndyrýǵa degen umtylysyn, joıǵysh ushqysh retinde memleketimizdiń áýe shebin kúzetýdegi mindetterdi oryndap júrgenin atap ótken jón. Ol jaýyngerlik avıasıadaǵy áıelderdiń erlermen teń dárejede kúrdeli mindetterdi oryndaı alatynyn dáleldedi», - dedi avıasıa general-leıtenanty Nurlan Ormanbetov.
Qazaqstandaǵy áskerı avıasıanyń jalǵyz áıel ushqyshy Qaraǵandy avıabazasynda qyzmet etedi. Birneshe aı boıy Ardana Taldyqorǵan qalasyndaǵy avıasıa bazasynda arnaıy oqýdan ótken.
«Sý-30SM ushaǵymen jeke ushý - men úshin kásibı turǵyda qalyptasýǵa jasaǵan úlken qadam. Aldaǵy maqsatym - tehnıkany jaqsartý jáne jer ústindegi, áýedegi maqsattarǵa jáne toptyq ushýlarǵa jaýyngerlik qoldanýǵa ruqsat alý úshin ári qaraı daıarlyq baǵdarlamasyna mashyqtaný daǵdylaryn pysyqtaý», - dep Ardana Botaı bolashaqqa arnalǵan josparlarymen bólisti.
Mamandardyń aıtýynsha, atalǵan Sý-30SM – kóp fýnksıonaldy 4++ býyndy joıǵysh ushaq. Ol kez kelgen aýa raıynda, kúndiz-túni áreket etýge qabiletti. Áýe barlaýyn júrgizýge, áýede, jer ústinde jáne teńizde nysandardy joıýǵa arnalǵan.
Joǵary manevrli joıǵysh ushaqpen ushýǵa ruqsat alý úshin birneshe aı boıy teorıalyq bilim alyp, arnaıy Sý-30SM trenajerynda jattyǵady, shtýrman retinde ushady. Kóptegen synaqtar men emtıhandardy sátti tapsyrǵan soń ǵana, táýelsiz ushýǵa ruqsat alady.
