Bıyl Ákeler odaǵynyń qurylǵanyna 10 jyl tolady
Elordada «Otbasy – ult tiregi!» atty VII respýblıkalyq ákeler forýmy ótti, dep habarlaıdy Almaty-akshamy.kz QazAqparatqa silteme jasap.
Jıynda «Ákeler odaǵy» RQB tóraǵasy Maqsutbek Aıtmaǵanbet ákeler birlestiginiń qurylý tarıhyna toqtalyp, forýmnyń mańyzdylyǵyn atap ótti.
Ákeler forýmynda ulttyq qundylyqtar, patrıotızm, ınklúzıa, otbasylyq bilim, ómirlik daǵdylar, mektepterdegi ákeler keńesi jáne buqaralyq sport taqyryptarynda 7 sesıa ótti.
«Bıyl Ákeler odaǵynyń qurylǵanyna 10 jyl tolady. Osy jyldar ishinde qozǵalys elimizdiń barlyq óńirlerin qamtydy. Jaýapty, sanaly jáne pozıtıvti ata-ana bolýǵa baǵyttalǵan 1000-nan astam joba iske asyryldy», - dedi M.Aıtmaǵambet forýmnyń ashylýynda.
Pedagog-koých Ǵalymbek Bermaǵambetovtiń aıtýynsha, Ákeler forýmynyń naqty nátıjesi – kóp mektepterde ákeler keńesiniń qurylýy boldy.
«Kóp jaǵdaıda mektepte ata-analar jınalysy dese, oǵan analar ǵana baratyn. Al qazir ákeler keńesi jıi ótedi, jyldyq jospar jasalyp, ákesi joq balalarǵa áke ornyn toltyrý máseleleri talqylanady. Taǵy bir ózekti másele – qazirgi ákeler kóbine bankomatqa uqsap barady, tek materıaldyq qajettilikke ǵana mán berý kóbeıdi. Bala tárbıesin de bıznes tilimen aıtsaq, óz jubaıyna, tárbıeshige «aýtsorsqa» jiberdi. Ana qansha jerden myqty bolsa da, ákeniń ornyn toltyra almaıtynyn, áke de ananyń ornyn, muǵalim de ata-ananyń ornyn basa almaıtynyn jaqsy bilemiz. Ákeler odaǵy osy máseleni halyqqa jetkizip, oı salýǵa tyrysyp júr», - dedi Ǵ. Bermaǵambetov.
Pedagog bala tárbıesi jar tańdaýdan bastalatynyn eske saldy.
«Adam ne úshin úılenip jatqanyn, ári qaraı otbasy qandaı baǵytta órbıtinin sanaly túrde túsinip úılenýi kerek. «Balany emes, ózińdi tárbıele» degen tujyrym kóptegen ulttyń fılosofıasynda kezdesedi. «Bala – ata-ananyń oryndalmaı qalǵan armany» degen de sóz bar. Iaǵnı, bir áke shylym shegýdi qoıa almasa, óz jigerin jeńe almasa, balasynyń shylym shekpegenin qalap, tyıym sala bastaıdy. Demek, balaǵa úlgi retinde bolýy kerek. Kóp ákeler balasyna úlgi bolý syndy alǵa úlken mindet qoımaǵandyqtan, qoǵamda zorlyq-zombylyq, ajyrasý jıiledi», - deıdi Ǵ. Bermaǵambetov.