Telehıkaıanyń túsirilim jumystary Almaty jáne Qostanaı oblystarynda ótti
«Qazaqstan» teleradıokorporasıasy búgin elordada Alash qaıratkeri Mirjaqyp Dýlatulyna arnalǵan «Mirjaqyp. Oıan, qazaq!» tarıhı telehıkaıasynyń tusaýkeserin ótkizdi. Tusaýkeserge depýtattar, zıaly qaýym ókilderi, tarıhshylar men jýrnalıser qatysty, dep habarlaıdy Almaty-akshamy.kz.
Alty bólimdi tarıhı týyndyda Mirjaqyp Dýlatuly ómiriniń 1909-1935 jyldardaǵy kezeńi qamtylady. Mirjaqyptyń «Oıan, qazaq!» kitabynyń jaryqqa shyǵýy, «Baqytsyz Jamal» romanynyń jazylýy, revolúsıadan keıingi jyldardaǵy, asharshylyq kezindegi qoǵamdyq-saıası qyzmeti, Qyzylorda, Semeı, Máskeýdiń áıgili «Býtyrka» abaqtysyndaǵy jyldary jáne jary Ǵaınıjamalmen mahabbat hıkaıasy serıalda kezek baıandalady.
Tarıhı týyndynyń maqsaty - Mirjaqyp Dýlatulynyń ómiri men shyǵarmashylyǵyn qyzyqty sújettik jeli arqyly keńinen nasıhattaý arqyly jastar boıynda memleketshildik rýhty qalyptastyrýǵa yqpal etý.
«Qazaqstan» arnasy Táýelsizdik kúni qarsańynda Alash qaıratkeri Mirjaqyp Dýlatulyna arnalǵan tarıhı telehıkaıany kópshilik nazaryna usynyp otyr. Sońǵy jyldary otandyq telearnalarda ult rýhanıatynyń uly tulǵaryn ulyqtaýǵa arnalǵan, tarıhı taqyryptardan tamyr tartqan túrli týyndylar kórsetilýde. Mazmundyq ári sapalyq turǵyda olardyń kópshiligi talǵampaz kórermenniń joǵary baǵasyna ıe bolyp otyr. Búgingi «Mirjaqyp. Oıan, qazaq!» telehıkaıasy sol taǵylymdy úrdisti jalǵap, óz údesinen shyǵady dep senemin. Jalpy, Mirjaqyp Dýlatulynyń shyǵarmashylyq bolmysyn zerdeleýde jasalyp jatqan osyndaı úlken izdenister laıyqty baǵasyn alýǵa tıis», - dedi Aqparat jáne qoǵamdyq damý mınıstri Darhan Qydyráli.
Telehıkaıanyń rejıseri - Murat Esjan, prodúseri - Aısáýle Ábildaeva. Senarı avtorlary - Murat Esjan, aqyn, dramatýrg Ularbek Nurǵalymuly jáne alashtanýshy ǵalym Ushqyn Sáıdirahman.
Serıalda bas keıipker Mirjaqyp Dýlatovtyń rólin Baqyt Qajybaev, jary Ǵaınıjamaldyń rólin Zarına Karmen, qyzy Gúlnar Dýlatovanyń rólin Gúljas Ápsetova oınaıdy. Ahmet Baıtursynuly men Álıhan Bókeıhanov beınesin «Qazaqstan» telearnasy túsirgen «Ahmet. Ult ustazy» telehıkaıasynyń basty keıipkerleri Baıǵalı Esenáli men Baýyrjan Qaptaǵaı somdaıdy.
Telehıkaıanyń túsirilim jumystary Almaty jáne Qostanaı oblystarynda ótti. «Mirjaqyp. Oıan, qazaq!» telehıkaıasy «Qazaqstan» telearnasynan 16-17 jeltoqsan kúnderi 18:00-de efırge shyǵady.
«Bul – «Qazaqstan» teleradıokorporasıasynyń sońǵy eki jylda túsirgen 11-shi tarıhı telehıkaıasy. Eki jyl ishinde kórermenge túrli janrda 500-ge jýyq bólimnen turatyn 33 telehıkaıa usyndyq. Qazir biz úshin de, serıaldar óndirisimen aınalysatyn prodakshn kompanıalar úshin de shyńdalý kezeńi. Tarıhı serıaldarǵa qatysty ótken jyly kórermen tarapynan aıtylǵan keıbir kemshilikterdi, qatelikterdi qaıtalamaýǵa tyrystyq. Jalpy, televızıalyq serıal óndirisinde qoıǵan maqsatymyz – aldymen, ozyq qoǵamdyq qundylyqtardy, tulǵalarymyzdyń ómirin nasıhattaý bolsa, ekinshiden aýdıtorıanyń óz otandyq ónimderimizben maqtanatyn deńgeıge jetý», - dedi Basqarma tóraıymy Lázzat Tanysbaı tusaýkeser sharasynda sóılegen sózinde.
Basqarma tóraıymy «Mirjaqyp. Oıan qazaq!» telehıkaıasynyń tusaýkeserinen keıin «Qazaqstan» teleradıokorporasıasynyń tarıhshy, ǵalym Álkeı Marǵulan tulǵasyna arnalǵan 4 bólimnen turatyn «Álkeı. Ǵulama ǵumyr» serıaly efırge shyǵatynyn jetkizdi. Al Qyrǵyzstan jáne Ózbekstanmen birlese túsirip jatqan «Qorqyt ata» serıaly 2023 jyly jaryqqa shyqpaq.