Premer-mınıstr Oljas Bektenov Shyǵys Qazaqstan oblysyndaǵy Buqtyrma sý qoımasy arqyly ótetin elimizdegi eń uzyn kópirdiń ashylýyna qatysty, dep habarlaıdy aqshamnews.kz.

Atalmysh kópir 6 aýdandy – Kúrshim, Úlken Naryn, Marqakól, Katonqaraǵaı, Tarbaǵataı jáne Zaısan aýdandaryn baılanystyrady.

Kólik mınıstri Marat Qarabaev premer-mınıstrge uzyndyǵy 1316 metr eki jolaqty avtomobıl kópiriniń qurylysy aıaqtalǵany týraly baıandady. Kópir táýligine 80 myńǵa deıin kólik ótkize alady, ótkelge 18 shaqyrym jańa jol tartyldy. Joba ozyq ınjenerlik tehnologıalardy qoldana otyryp jáne barlyq sapa standarttaryna sáıkes iske asyryldy.

Oblys turǵyndarymen kezdesýde premer-mınıstr jobany iske asyrý kóliktiń jyl boıy qaýipsiz qozǵalysyn qamtamasyz etetinin, Shyǵys Qazaqstannyń áleýmettik-ekonomıkalyq damýyna serpin beretinin jáne elimizdiń kólik-logıstıka salasynyń damýyna oń áser etetinin atap kórsetti.

Jańa kópir memleket basshysynyń tapsyrmasy boıynsha turǵyndardyń jaılylyǵy men qaýipsizdigin arttyrý maqsatynda salyndy. Aımaqta turǵyndar 50 jyl boıy jazda ne parommen, qysta tikeleı ne muz ústimen júrgenin bilesizder. Qurylystyń salynýyn jergilikti turǵyndar uzaq kútti, – dep atap ótti Oljas Bektenov.

Óz kezeginde, kópirdiń ashylýyna kelgen aımaq turǵyndary kópir sý qoımasynyń eki jaǵyndaǵy eldimekender arasyndaǵy kólik qatynasyn edáýir jaqsartatynyn, bul turǵyndardyń jeńil qatynaýyn qamtamasyz etetinin, taýarlar qozǵalysyn jedeldetetinin, qyzmetterge qoljetimdilikti arttyryp, sondaı-aq oblystyń týrısik áleýetin ashýǵa múmkindik beretini týraly pikir bildirdi.

2019 jyly osy óńirdiń halqy elimizdiń prezıdentine aryz-tilegin jazǵan. Qasym-Jomart Kemeluly Toqaev halyqtyń tilegine kóńil bólip, eldiń 60 jyl armandaǵan kópirin salýǵa qazynadan qarajat bóldi. Jobada eńbek etken tek elimizdiń azamattary. Shetelden tartylǵan birde-bir maman joq. Qanshama kisige jumys tabyldy. Qurylys qystyń aıazynda, jazdyń aptap ystyǵynda da júrgizildi, – dedi Kúrshim aýdanynyń qurmetti azamaty Baqythan Ólmesekov.

Premer-mınıstr iri jobalardy iske asyrý barysynda otandyq mamandar men merdiger kompanıalardy tartýǵa erekshe nazar aýdarylatynyna toqtaldy.

Memleket basshysy atalǵan jobaǵa, jalpy óńirlerdiń damýynap úlken kóńil bólip keledi. Siz durys aıttyńyz, ári jumys berip ári ınfraqurylymdyq baılanys pen damýdy qamtamasyz etetin megajobalar kóp bolýy kerek. Syrttan eshkimdi tartpaı-aq, bizdiń óz quzyretimiz de jetkilikti. Osyndaı respýblıkalyq mańyzy bar osyndaı iri jobalardy júzege asyrýdy jalǵastyramyz. Qazir Prezıdenttiń tapsyrmasy boıynsha Úkimet otandyq kásipkerdi, otandyq óndirýshilerdi qoldaý saıasatyn júrgizip jatyr, – dep atap ótti Oljas Bektenov.

Esterińizge sala ketıik, buǵan deıin Táýelsizdik kúnine oraı Shyǵys Qazaqstanda elimizdegi eń uzyn kópirdiń ashylatynyn týraly jazǵan bolatynbyz.