Bıyl avtojol salasynda birneshe mańyzdy jobany aıaqtaý kózdelgen.
Solardyń biri Túrkistan oblysy Shaqpaq baba asýyndaǵy Qazaqstandaǵy eń uzyn avtomobıl tonneli (840 m) tamyz aıynda paıdalanýǵa beriledi. Tonneldiń ashylýy qys mezgilinde júrgizýshilerge kedergisiz júrýge múmkindik beredi. Bul týraly Premer-Mınıstr Oljas Bektenovtiń tóraǵalyǵymen ótken Úkimet otyrysynda kólik mınıstri Marat Qarabaev baıandady, dep habarlaıdy almaty-akshamy.kz.
Ekinshi joba — Almaty aglomerasıasy úshin tranzıttik mańyzy zor, uzyndyǵy 6 shaqyrymdy quraıtyn Shamalǵan stansasyndaǵy avtomobıl jol aıryǵy qyrkúıek aıynda iske qosylady.
Úshinshisi — elimizdiń ortalyq jáne soltústik óńirlerin «Batys Qytaı – Batys Eýropa» dálizimen baılanystyratyn 262 shaqyrymdyq «Merke – Býrylbaıtal» avtojoly paıdalanýǵa beriledi.
Tórtinshi. Shyǵys Qazaqstandaǵy Buqtyrma sý qoımasy arqyly salynyp jatqan 1,3 myń metrlik kópirdiń qurylysyn da osy jyly aıaqtaý josparlanǵan. Jaz mezgilinde parom arqyly, qys mezgilinde muzdyń ústimen júretin turǵyndar úshin kópirdiń ashylýy qaýipsiz jol qozǵalysyn qamtamasyz etedi.
«Ol Shyǵys Qazaqstan oblysyndaǵy 4 aýdandy bir birimen baılanystyrady. Bul tarıhı joba 60 jyldan beri talqylanyp kele jatqan edi. Al qazir joba Memleket basshysynyń tıisti sheshiminiń arqasynda iske asyrylyp, jyl sońyna deıin halyq ıeligine tapsyrylatyn bolady», - dedi M. Qarabaev.
Taǵy bir joba – Batys Qazaqstannyń shalǵaıyndaǵy Bókeı Ordasy týrısik aımaǵyn damytý maqsatynda uzyndyǵy 245 shaqyrym bolatyn «Kaztalovka – Jánibek» jáne «Ónege – Bısen – Saıqyn» avtomobıl joldarynyń kúrdeli jóndeý jumystary da osy jyldyń sońyna deıin tolyqtaı aıaqtalatyn bolady.