Olar jolaýshylar quqyǵyn buzǵan.
Qazaqstan Úkimeti jolaýshylardyń shaǵymdaryna baılanysty tekserý jumystaryn júrgizip jatyr, dep habarlaıdy Almaty-akshamy.kz.
Qazirgi ýaqytta Qazaqstan Respýblıkasy Indýstrıa jáne ınfraqurylymdyq damý mınıstri Qaıyrbek Óskenbaevtyń tapsyrmasy boıynsha Azamattyq avıasıa komıteti «Qazaqstannyń avıasıa ákimshiligi» AQ-men birlesip, kóptegen reısterdiń keshigýine jáne jolaýshylardan túsken shaǵymdarǵa baılanysty tekserýdi jalǵastyrýda.
«Tergeý barysynda aǵymdaǵy jyldyń 5 maýsymynda «Eır Astana» kompanıalar tobyna kiretin Fly Arystan áýe tasymaldaýshysynyń Almaty – Shymkent baǵyty boıynsha KS-7105 reısi 15 saǵat 10 mınýtqa keshikkeni anyqtaldy. Osy reıstiń jolaýshylaryna ushýdy kútý kezinde «Qazaqstan Respýblıkasynyń áýe keńistigin paıdalaný jáne avıasıa qyzmeti týraly» Qazaqstan Respýblıkasy Zańynyń 86-babynyń 1-bóliginde kózdelgen qyzmetter, atap aıtqanda, qonaq úıde ornalastyrý qyzmetteri durys deńgeıde kórsetilmegen», - delingen Indýstrıa jáne ınfraqurylymdyq damý mınıstrligi baspasóz qyzmetiniń habarlamasynda.
Osyǵan baılanysty aǵymdaǵy jyldyń 28 shildesinde, avıakompanıaǵa qatysty Qazaqstan Respýblıkasynyń Ákimshilik quqyqbuzýshylyq týraly kodeksiniń 567-babynyń 2-bóligimen ákimshilik quqyqbuzýshylyq týraly hattama jasalyp, oǵan sáıkes avıakompanıaǵa 1000 AEK (3 000 063 teńge) kóleminde aıyppul salyndy.
Buǵan deıin «Eır Astana» kompanıalar toby aǵymdaǵy jyldyń 7 jáne 21 shildesinde reısti keshiktirý kezinde jolaýshylardyń quqyqtaryn buzǵany úshin 1000 AEK (3 000 063 teńge) kóleminde aıyppul túrinde ákimshilik jaýapkershilikke tartyldy.
Jalpy bıyl «Eır Astana» kompanıalar toby reıstiń keshigýi kezinde jolaýshylardyń quqyqtaryn buzǵany úshin 9 189 000 teńge kóleminde ákimshilik jaýapkershilikke tartyldy.
Qazirgi ýaqytta reıstiń keshigýine jáne jolaýshylar quqyqtarynyń buzylýyna baılanysty tergeý jalǵasýda, quqyqbuzýshylyq faktileri anyqtalǵan jaǵdaıda tasymaldaýshylar Qazaqstan Respýblıkasynyń qoldanystaǵy zańnamasyna sáıkes jaýapkershilikke tartylady.