QR DSM Sanıtarıalyq-epıdemıologıalyq baqylaý komıteti 2021 jyldyń 9 aıynda eldiń naryǵynda satylatyn tamaq ónimderiniń sapasy men qaýipsizdigin qamtamasyz etý boıynsha jumystyń qorytyndysyn shyǵardy, dep habarlaıdy almaty-akshamy.kz QazAqparatqa silteme jasap.
«Bıyldyń 9 aıynda monıtorıń aıasynda 22175-ten astam tamaq ónimderiniń synamalary zertteldi, olardyń 2537-si (11,4%) tehnıkalyq reglamentterdiń talaptaryna jaýap bermedi.
Tańbalaý erejeleriniń saqtalmaýy - 70%, mıkrobıologıalyq kórsetkishter boıynsha sáıkessizdik 16,1%, tańbalaýda málimdelgen ónimniń kórsetkishteri boıynsha sáıkessizdik (jalǵan ónimniń bolýy) nemese tutynýshyny jańylystyratyn kórsetkishter boıynsha – 14 paıyzdy qurady» , - dep habarlady vedomstvodan .
Komıtette atap ótkendeı, sáıkessizdikterdiń eń kóp sany et ónimderinde – 14,5%, qus etinde – 25,1%, balyqta - 12%, maı ónimderinde – 4,3%, sút ónimderinde – 10,3%, kondıterlik ónimderde – 9,9%, nan-toqash ónimderinde – 0,8 %, jemis-kókónis ónimderinde – 3,1%, qaptalǵan aýyz sýda, onyń ishinde mıneraldy sýda – 0,3 %, shyryn ónimderinde – 1,9 %, alkogól ónimderinde – 1,1 %, alkogólsiz sýsyndar - 4,5 %, arnaıy tamaq ónimderi – 5,5 %, bıologıalyq belsendi qospalar (BBQ) - 0,9% jáne ózge de tamaq ónimderi -10,3%-yn qurady. Belgili bolǵandaı, talaptardy buzýdyń negizgi úlesi EAEO-ǵa múshe memleketterden jetkiziletin ónimderde – 55,4 %, basqa elderden 21,8% anyqtaldy. Otandyq óndirýshilerdiń belgilengen talaptarǵa saı kelmeıtin ónimi 22% qurady.
«Anyqtalǵan barlyq faktileri boıynsha 1246 uıǵarym berildi, ákimshilik quqyq buzýshylyq týraly 20 is qozǵaldy, 6 mln teńgeden astam somaǵa aıyppul salyndy. 3,8 tonnadan astam qaýipti ónim satylymnan alyndy», - delingen komıtet málimetinde.