Bul týraly Ekologıa, geologıa jáne tabıǵı resýrstar vıse-mınıstri Serik Qojanıazov Ortalyq komýnıkasıalar alańynda ótken brıfıńte málimdedi, dep habarlaıdy Almaty-akshamy.kz
«Josparda maqta, kúrish, pıaz sıaqty ylǵaldy kóp qajet etetin daqyldardy qysqartý, Túrkistan jáne Qyzylorda oblystaryndaǵy daqyldar egýge arnalmaǵan jerlerde kúrish egýge jol bermeý, sondaı-aq ASHM men jergilikti atqarýshy organdar arasyndaǵy Memorandýmǵa sáıkes, kúrish alqaptarynyń alańdaryn azaıtý jónindegi sharalar kózdelgen», – dedi vıse-mınıstr.
Onyń aıtýynsha, ońtústik óńirlerdiń ákimdikterinen sý az bolǵan jaǵdaıda vegetasıa júrgizý úshin sharalar qabyldaý boıynsha usynystar suraldy.
Sonymen qatar óz sózinde spıker ózen baseınderi boıynsha sý jınaý kólemin aıtty.
«Qazirgi ýaqytta sý qoımalary josparly kestelerge sáıkes jumys isteıdi. Jalpy, sý tasqyny qaýpi bar baseınderde qar jınaý prosesi naýryzǵa deıin jalǵasady jáne kóktemgi kezeńge arnalǵan negizgi gıdrologıalyq boljam 2022 jylǵy 1 naýryzda usynylady.Sý toraptary arqyly tasqyn sýlardy apatsyz ótkizýdi paıdalaný erejelerine jáne negizgi gıdrologıalyq boljamǵa sáıkes jáne TJM jergilikti atqarýshy organdarymen jáne qyzmetterimen úılestire otyryp qamtamasyz etiletin bolady», – dedi S. Qojanıazov.