Mamandar vızalardyń túri qandaı bolatynyn jetkizdi.
Memleket Úkimeti vızalardyń jańa túrlerin engizýdi kózdep otyr, dep habarlaıdy Almaty-akshamy.kz.
«Memleket basshysy Qasym-Jomart Toqaevtyń bıylǵy 1 qyrkúıektegi Qazaqstan halqyna Joldaýynda elimizdiń kóshi-qon saıasatynyń tıimdiligin arttyrý boıynsha jańa sharalardyń paketi usynyldy. Olardy iske asyrý maqsatynda Kóshi-qon saıasatynyń aldaǵy 5 jylǵa arnalǵan jańa tujyrymdamasy sheńberinde respýblıkada sheteldikter úshin erekshe jaǵdaılardy kózdeıtin baǵaly daǵdylar men ınvestısıalyq vızalar úshin arnaıy vızalar engizý kózdeletin bolady», - delingen Eńbekmıni baspasóz qyzmetiniń habarlamasynda.
Memleket basshysynyń tapsyrmasyn oryndaý úshin jańa Tujyrymdama sheńberinde Qazaqstan úshin tapshy jáne jıi tartylatyn kásipter boıynsha 100 úzdik sheteldik mamandy tartýdyń tetigi kózdeletin bolady. Bul kásibı mamandardyń mindeti bilim transferi jáne óndiriste jumys isteıtin qazaqstandyqtardy daıarlaý bolady.
Olar úshin turýǵa yqtıarhaty bar «Baǵaly daǵdylarǵa arnalǵan vıza» engiziledi jáne qazaqstandyq kadrlardy ozyq daıarlaý úshin únemi jańartylyp otyratyn baǵaly daǵdylar reıtıńi (tapshy kásipter men mamandyqtar) qalyptastyrylady.
Sondaı-aq, Memleket basshysynyń tapsyrmasyn iske asyrý aıasynda jańa Tujyrymdama jobasynda bıznes-ımmıgrasıa tásilderi ózgertiledi.
EYDU elderiniń tájirıbesin negizge ala otyryp, Qazaqstan ekonomıkasyna bir mezgilde 300 myń AQSH dollaryn ınvestısıalaǵan sheteldik bıznesmender úshin ınvestısıalyq jáne iskerlik vızalar alý sharttaryn qaıta qaraý usynylady. «Investısıalyq vıza» 10 jyldyq turýǵa ruqsat beredi. Vıza ıesi bıznesti tirkeýge, múlikke ıelik etýge, qarjylyq operasıalardy júrgizýge múmkindik alady.
Bul Qazaqstanǵa jylyna, ásirese, kreatıvti ındýstrıany damytý salasynda 100-ge deıin bıznesmen-ınvestor tartýdy neǵurlym naqty maqsatqa aınaldyrady.
Budan basqa bilim berý ımıgrasıasyn damytý maqsatynda Tujyrymdamada mynalar kózdeletin bolady:
- sheteldik jetekshi bilim berý mekemelerin akademıalyq utqyrlyq baǵdarlamasyna tartý jáne qos dıplomdy bilim berý praktıkasyn odan ári damytý arqyly eldik bilim berý ınfraqurylymyn keńeıtý;
- suranysqa ıe mamandyqtar boıynsha 100 úzdik oqytýshyny jáne suranysqa ıe tehnologıalar boıynsha ǵalymdardy tartý. Bul rette sheteldik ǵalymdar men oqytýshylar úshin turýǵa yqtıarhat, al keıinnen Qazaqstan azamattyǵyn alý quqyǵyn bere otyryp, uzaq merzimdi (10 jylǵa deıin) «Ǵylymı-pedagogıkalyq vızalar» kózdeletin bolady.
Osy strategıalyq mindetti iske asyrý elimizdiń joǵary mektep pen ǵylymnyń bedelin, azamattarymyzdyń zıatkerlik jáne shyǵarmashylyq áleýetin arttyrýǵa jáne, saıyp kelgende Respýblıkamyzdaǵy adamı kapıtalynyń ınovasıalyq damýy úshin jaǵdaı jasaýǵa múmkindik beredi.