Atalǵan merekeni bekitý sala qyzmetkerlerin yntalandyrýǵa yqpal etedi.
Qazaqstanda veterınarıa qyzmetkerleriniń kásibı merekesi bekitilýi múmkin. Bul týraly ashyq talqyǵa shyǵarylǵan Úkimet qaýlysynda jazylǵan, dep habarlaıdy Almaty-akshamy.kz.
«Epızootıalyq jaǵdaıdyń saýlyǵy jáne mal sharýashylyǵy ónimderiniń eksporttyq áleýetiniń artýy qaýipsiz ónim óndirýdi qamtamasyz etetin veterınarıa júıesimen tyǵyz baılanysty. Búgingi kúni Qazaqstanda Malshylar kúni, Orman sharýashylyǵy qyzmetkeri kúni, Aýyl sharýashylyǵy, tamaq jáne qaıta óńdeý ónerkásibi qyzmetkerleri kúni, Balyq sharýashylyǵy qyzmetkerleri kúni sıaqty kásibı merekeler bar. Alaıda, búgingi kúni veterınarıa salasyndaǵy qyzmetkerlerdiń ózderiniń kásibı merekelerin atap ótý múmkindigi joq jáne osyndaı mereke bolmaǵandyqtan, biryńǵaı kásibı qoǵamdastyq salasyna ózderiniń qatystylyǵyn sezinbeıdi. Sondyqtan 10 shilde - QR «Veterınarıa týraly» zańy qabyldanǵan kúndi Veterınarıa qyzmetkeri kúni dep aıqyndaýdy usynamyz», - dep jazylǵan qujatta.
Aýyl sharýashylyǵy mınıstrliginiń málimetine saı, atalǵan merekeni bekitý sala qyzmetkerlerin yntalandyrýǵa jáne veterınarıanyń strategıalyq mańyzdylyǵyn aıqyndaýǵa sep bolmaq.
Qujatty ashyq talqylaý 14 jeltoqsanǵa deıin jalǵasady.