Qazaqstan Respýblıkasy Kólik mınıstrliginiń Azamattyq avıasıa komıteti men Qazaqstannyń avıasıalyq ákimshiligi (QAÁ) Halyqaralyq áýe kóligi qaýymdastyǵynyń (IATA) ushý qaýipsizdigi men turaqty damý máselelerine arnalǵan aımaqtyq semınary ótkizdi.
Semınardyń ashylýynda Azamattyq avıasıa komıtetiniń Tóraǵasy Saltanat Tompıeva men QAÁ bas dırektory Katalın Radý quttyqtaý sóz sóıledi. Olar óz sózinde IATA-nyń Eýropa boıynsha óńirlik Vıse-prezıdenti Rafael Shvarsman myrzaǵa aımaqtyq sharany Qazaqstanda uıymdastyrǵany úshin alǵystaryn bildirdi. Vıse-prezıdent bastaǵan kóptegen IATA sarapshylarynyń qatysýymen bul semınar Qazaqstanda alǵash ret ótti, dep habarlaıdy aqshamnews.kz
Semınarǵa avıasıalyq bılik organdarynyń 70-ten astam mamandary, sondaı-aq 7 eldiń – Ázirbaıjan, Grýzıa, Qyrǵyzstan, Moldova, Mońǵolıa, Ózbekstan jáne Qazaqstannan áýekompanıalardyń, áýejaılardyń, aeronavıgasıalyq qyzmet provaıderleriniń jáne janarmaı jetkizýshileriniń avıasıalyq qaýipsizdik jáne turaqtylyq jónindegi sarapshylary qatysty (Aeroflot, Azeraeronavigation, Azerbaijan Airlines, Air Astana, Berkut, Centrumair, FlyArystan, Qazaq Air, SCAT, Prime Aviation, Halyqaralyq áýejaı Almaty, Halyqaralyq áýejaı Aqtaý, Halyqaralyq áýejaı Nursultan Nazarbaev, «QazMunaıGaz-Aero», «QazMunaıGaz» Ulttyq kompanıasy, Uzbekistan Airways, Qanot Sharq, TezJet, United Airports of Georgia).
Semınar ushý qaýipsizdik, jerde qyzmet kórsetý jáne avıasıa salasyndaǵy turaqtylyq salalaryndaǵy sońǵy trendter men ozyq tájirıbelerdi talqylaýǵa biregeı múmkindik berdi. Ushý qaýipsizdigi máseleleri boıynsha semınardy Janat Abdýgalımov jáne turaqty damý máseleleri boıynsha Janna Shek júrgizdi. Semınar baǵdarlamasyna IATA jetekshi sarapshylary (Djankarlo Býono – Eýropadaǵy ushý qaýipsizdigi jáne ushýdy uıymdastyrý dırektory, Sergeı Balonýskovs – aımaqtyq syrtqy baılanystar jáne turaqty damý bóliminiń aǵa menedjeri, Malvın Tan – komersıalyq otyn bóliminiń basshysy, Lea Hýannın – menedjer klımattyń ózgerýi saıasaty), azamattyq avıasıa salasynyń otandyq sarapshylary men QAÁ ókilderi, ınteraktıvti talqylaýlar jáne avıasıa salasyndaǵy áriptestermen baılanys ornatý múmkindikteri boldy.