Qazaqstanda Ulttyq sport stýdentter lıgasy qurylady. Bul týraly Ulttyq sport qaýymdastyǵynyń prezıdenti Islambek Saljanov Egemen Qazaqstan gazetine bergen suhbatynda aıtty, dep habarlaıdy aqshamnews.kz
Aldymen Islambek Saljanov jastardy ulttyq sport túrlerimen shuǵyldanýyna qoldaý kórsetken Týrızm jáne sport mınıstri Ermek Marjyqpaevtyń eńbegin atap ótti. Sondaı-aq qaýymdastyq basshysy stýdentter úshin arnaıy lıga qurylatynyn jetkizdi.
Taǵy da aqjoltaı jańalyǵymyz, ulttyq sportty stýdentter arasynda áıgileý maqsatynda jastardyń usynysymen «Ulttyq sport stýdentter lıgasyn» qurý josparlanyp otyr. Bul joba boıynsha Ǵylym jáne joǵary bilim mınıstrimen kezdesý ótip, Týrızm jáne sport mınıstrligimen de kelisim júrip jatyr. Qazaqstanda 100-den asa ýnıversıtet bar. Ol jerde 500 myńnan asa stýdent bilim alyp jatyr. Osy joba aıasynda jastarymyzdy ulttyq sportqa tartý kózdelip otyr, - dedi Islambek Saljanov.
Sondaı-aq qaýymdastyq prezıdenti búginde toǵyzqumalaq pen sadaq atý buqaralyq sıpatqa ıe bolǵanyn jetkizdi.
«Sadaq atý federasıasy qurylǵanymen, klýbtyq deńgeıde árkim óz kúnin ózi kórip kelgen. 2022 jyly barlyq klýbtyń basyn biriktirip, el chempıonaty uıymdastyryldy. Sol is-sharaǵa 183 sadaqshy mergen qatyssa, búginde sadaq atýmen kásibı túrde shuǵyldanýshylar qatary 5 myńǵa jetti. Qazir sadaq atý sportynyń damýy, taralý kókjıegi qarqyn alyp keledi. Mysaly, Túrkıa sadaqshylar arasynda Fetih Kupası (Jeńis kýbogi) halyqaralyq týrnırin uıymdastyrady. 10 jyldan beri turaqty túrde ótip kele jatqan saıysqa álemnen myńǵa tarta mergen qatysady. Túrik stılimen ótetin dodada sadaqshylar adyrnasyn kere jebesin alystaǵy nysanaǵa atýdan tartysqa túsedi. Mine, osy aıtýly dodada astanalyq sadaqshy Aıkórkem Batıhan chempıon atandy», - dedi ol.
Islambek Saljanov «Dástúrli sadaq atý» respýblıkalyq federasıa basshysy Aıdos Muqataevtyń jumysyna oń baǵa berdi.
Jastarymyz aldyńǵy býyn aǵalaryna eliktep, solar shuǵyldanatyn sportqa úıir keletinin kórip júrmiz. Sadaq atýǵa jastarymyzdyń qyzyǵýyna áleýmettik jelini tıimdi paıdalanatyn Memlekettik keńesshi Erlan Qarınniń sadaq atýmen aınalysatyny belgili bir dárejede óz septigin tıgizdi, - dedi qaýymdastyq basshysy.
Ol toǵyzqumalaq oıyny da joǵary qarqynmen damyp jatqanyn atap ótti.
«Bul baǵytta tájirıbesi mol, óz isiniń mamany, qoǵam jáne memleket qaıratkeri Álıhan Baımenovtiń eńbegin atap ótken jón. Álıhan Muhamedıauly júrgizip otyrǵan júıeli jumysynyń nátıjesinde búginde elimizde toǵyzqumalaqpen 200 myńǵa jýyq adam shuǵyldansa, 30 elde resmı ókildikteri qurylǵan.
Álemniń 50 memleketine toǵyzqumalaq taralyp otyr. Al jalpy bolashaqta ulttyq sportymyzdyń Olımpıada oıyndaryna usynýǵa suranyp turǵan sport túrleri bar. Bul – «Aýdaryspaq» pen «Jamby atý». Bul sharýany kóshpeliler oıyndaryn aman-esen ótkizip alǵan soń arnaıy talqylaýlar ótkizýge qujattarymyzdy ázirlep jatyrmyz. Ulttyq Olımpıada komıtetiniń basshysy Gennadıı Golovkınmen jumys júrgizip jatyrmyz, - dedi Islambek Saljanov.