Atalmysh qyzmet 15 maýsymda memlekettik tirkeýden ótti.
Elimizde ulttyq geologıalyq qyzmet memlekettik tirkeýden ótti. Bul týraly QR Ekologıa, geologıa jáne tabıǵı resýrstar mınıstri Serikqalı Brekeshev Májiliste ótken geologıa salasyn damytý taqyrybyna arnalǵan dóńgelek ústel barysynda málim etti, dep habarlaıdy Almaty-akshamy.kz QazAqparatqa silteme jasap.
«Qazir Sıfrlyq damý, Indýstrıa jáne ınfraqurylymdyq damý mınıstrlikterimen birlesip jer qoınaýyn paıdalaný salasy boıynsha biryńǵaı aqparattyq júıe «Kaznedra» platformasyn qurý boıynsha jumys júrip jatyr. Biryńǵaı platforma barlyq prosesti bir tereze arqyly ınvestorlarǵa keshendi servıstik qoldaý kórsetedi. Búginde atalǵan jobany iske asyrý boıynsha jol kartasy Úkimet qaraýyna engizildi. Sondaı-aq, Prezıdenttiń tapsyrmasy boıynsha «Qazgeoaqparat» jáne «Qazgeologıa» bazasynda ulttyq geologıalyq qyzmet quryldy», - dedi Serikqalı Brekeshev Májilis qabyrǵasynda baıandama jasaı otyryp.
Mınıstrdiń aıtýynsha, ulttyq geologıalyq qyzmet 15 maýsymda memlekettik tirkeýden ótti.
«Jalpy geologıa salasyn memlekettik turǵydan retteýde jetekshi elderde (Avstralıa, AQSH, Ulybrıtanıa, Kanada, Koreıa jáne taǵy basqa) ulttyq geologıalyq qyzmet tabysty jumys atqaryp keledi. Atalǵan qyzmeti salaǵa qatysty barlyq aqparattyń ashyq ári qoljetimdi bolýyna múmkindik beredi. Sonymen qatar ulttyq qyzmetti engizý aıasynda mıneraldyq resýrstardyń ulttyq derekter bazasyn paıdalaný, geologıa salasyna qatysty aqparatty júıelep, taldaý arqyly ınvestorlarǵa keshendi servıstik qoldaý kórsetpekpiz», - deıdi ol.
Buǵan deıin habarlaǵanymyzdaı, geologıa salasyn damytýdyń 2026 jylǵa deıingi tujyrymdamasy ázirlendi.