Qazaqstanda úı janýarlaryn mindetti esepke alý engiziledi. Bul týraly QR Ekologıa, geologıa jáne tabıǵı resýrstar vıse-mınıstri Álıa Shalabekova aıtty, dep habarlaıdy almaty-akshamy.kz
«Zań jobasy (Janýarlarǵa jaýapkershilikpen qaraý týraly» zań jobasy) úı janýarlary ıeleriniń qarajaty esebinen aqyly negizde esepke alý quralyn qoldaný arqyly úı janýarlaryn mindetti esepke alýdy engizedi. Ony josparly iske asyrý jáne úı janýarlaryn esepke alýdy júzege asyratyn uıymdarǵa, sondaı-aq olardyń ıelerine birjolǵy jappaı júktemeni boldyrmaý maqsatynda zań jobasynda úı janýarlaryn mindetti esepke alýdy keıinge qaldyrý normasy kózdelgen. Úı janýarlaryn mindetti esepke alý 2023 jylǵy 1 qyrkúıekten bastap engiziledi», - dedi vıse-mınıstr Ortalyq komýnıkasıalar qyzmetindegi baspasóz máslıhatynda.
Onyń atap ótýinshe, janýarlardy ustaý salasynda «qoǵamdyq ınspektorlar» uǵymyn engizý de usynylady. Al janýarlarǵa qaraý salasynda qoǵamdyq baqylaý júrgizýdiń neǵurlym egjeı-tegjeıli tártibin ýákiletti organ aıqyndaıdy.
«Jergilikti atqarýshy organdarǵa janýarlarǵa arnalǵan panajaılardyń qyzmetin aqparattyq qamtamasyz etýge, janýarlardy ıelerine berýge, joǵalǵan janýarlardyń ıelerin izdestirýge jáne úı janýarlaryn bıosterılızasıalaý qajettiligi týraly habardar etýge baǵyttalǵan áleýmettik jarnamany uıymdastyrý quzyreti beriledi», - dedi ol.