Qazaqstanda tyıym salynǵan avtorlardyń jeke tizimi júrgizilmeıdi. Bul týraly İshki ister mınıstrligi agenttiktiń resmı saýalyna bergen jaýabynda málimdedi, dep habarlaıdy aqshamnews.kz.
Mınıstrliktiń túsindirýinshe, esepke avtorlar emes, sot sheshimimen el aýmaǵynda saqtaýǵa, ákelýge, tasymaldaýǵa jáne taratýǵa tyıym salynǵan materıaldar ǵana engiziledi. Mundaı materıaldardyń tizimi QR Bas prokýratýrasynyń Quqyqtyq statısıka jáne arnaıy esepke alý komıtetiniń resmı saıtynda jarıalanyp otyrady. Budan bólek, memlekettik organdardyń biryńǵaı ınternet-resýrstary arqyly dinı saraptamadan oń qorytyndy alǵan materıaldar týraly aqparat toqsan saıyn jańartylady.
Dinı ádebıetti taratý erejeleri
“Dinı qyzmet jáne dinı birlestikter týraly” zańnyń 9-babyna sáıkes, dinı ádebıetter men materıaldardy tek belgili bir oryndarda taratýǵa ruqsat etiledi:
• Qulshylyq ǵımarattarynda (ǵıbadat úılerinde);
• Dinı bilim berý mekemelerinde;
• Jergilikti atqarýshy organdar arnaıy belgilegen turaqty úı-jaılarda.
Dinı ádebıetti elge ákelý kezinde (jeke qoldanýǵa arnalǵan bir danadan basqa) tek tirkelgen dinı birlestikterge jáne dinı saraptamanyń oń qorytyndysyn alǵannan keıin ǵana ruqsat beriledi.
Dinı saraptama qalaı júrgiziledi?
Dinı saraptamany Qazaqstanda Mádenıet jáne aqparat mınıstrliginiń Din isteri komıteti júzege asyrady. Saraptama taǵaıyndaýdyń negizgi sebepteri:
• Jeke nemese zańdy tulǵalardyń ótinishteri;
• Dinı ádebıettiń kitaphana qorlaryna túsýi;
• Mısıoner retinde tirkelý jáne dinı birlestikterdi tirkeý kezinde;
• Dinı mazmundaǵy materıaldardy elge ákelý jaǵdaıynda;
• Qyzmettik buıryq negizinde;
• Dinı mazmundaǵy materıaldardy shyǵarý, daıyndaý nemese taratý kezinde.
Saraptama nátıjeleri Din isteri komıtetiniń resmı saıtynda jarıalanady.
Zań buzǵandarǵa qandaı jaza qarastyrylǵan?
Dinı materıaldardy saraptamasyz ázirlep nemese taratqan jaǵdaıda QR Ákimshilik quqyq buzýshylyq týraly kodeksiniń 490-baby 1-bóligi 3) tarmaqshasyna sáıkes jaýapkershilik kózdelgen:
• Jeke tulǵalar úshin — eskertý nemese 25 AEK kóleminde aıyppul;
• Zańdy tulǵalar úshin — 100 AEK kóleminde aıyppul salynady.
Buǵan deıin Mádenıet jáne aqparat mınıstrliginiń Din isteri komıteti Qazaqstandaǵy medreselerdiń qyzmetin retteý tártibine de túsinikteme bergen bolatyn.