QR Premer-Mınıstri Asqar Mamınniń tóraǵalyǵymen ótken Úkimet otyrysynda tutynýshylardyń quqyǵyn qorǵaý máselesi qaraldy dep habarlaıdy almaty-akshamy.kz
Osy baǵytta atqarylyp jatqan jumystar týraly saýda jáne ıntegrasıa mınıstri Baqyt Sultanov, Qarjy naryǵyn retteý jáne damytý agenttigi tóraǵasynyń birinshi orynbasary Oleg Smolákov, «Atameken» UKP basqarma tóraǵasy Abylaı Myrzahmetov baıandady.
Tutynýshylardyń quqyǵyn qorǵaýdy qamtamasyz etý maqsatynda 2020 jyly zańnamaǵa túzetýler engizildi, Úkimet janynan vedomstvoaralyq keńes quryldy jáne tutynýshylardyń quqyǵyn buzǵany úshin ákimshilik jaýapkershilik engizildi. 2021 jylǵy 1 qańtardan bastap «bir tereze» – e-tutynushy qaǵıdaty boıynsha tutynýshylardyń ótinishin qabyldaýdyń biryńǵaı aqparattyq júıesi qoldanysqa engizildi.
Jyl saıyn tutynýshylardyń quqyǵyn qorǵaý máseleleri boıynsha azamattardyń ótinishteriniń sany artýda. Máselen, Saýda jáne ıntegrasıa mınıstrligi 2019 jyly 6 myńǵa jýyq, 2020 jyly – 20 myńnan astam, osy jyldyń 10 aıynda – 21 myńnan astam ótinishti qarady.
Tutynýshylardy TKSH, bólshek saýda, medısınalyq, týrısik qyzmetter, baılanys jáne kólik salalary alańdatady. «Tutynýshylardyń quqyǵyn qorǵaý týraly» zańnyń jańa redaksıasynyń jobasy Qazaqstanda tutynýshylardyń quqyǵyn qorǵaý jónindegi ombýdsmen ınstıtýtyn engizýdi kózdeıdi.
«Qazaqstandyqtardyń turmys sapasyn arttyrý adal jáne básekege qabiletti kásipkerlikti damytýdyń ındıkatory bolyp tabylatyn tutynýshylardyń quqyǵyn qorǵaý deńgeıin arttyrýmen tyǵyz baılanysty. Óz quqyqtaryna senimdi tutynýshylar sapaly taýarlarǵa, jumystar men qyzmetterge belsendi suranysty qamtamasyz etedi. Bul ekonomıkanyń damýyna yqpal etedi», — dedi A. Mamın.
Internet-saýda salasynda tutynýshylardyń quqyǵynyń buzylýyna jol bermeý maqsatynda Úkimet basshysy Saýda jáne ıntegrasıa mınıstrligine múddeli memlekettik organdarmen jáne uıymdarmen birlesip, osy jyldyń sońyna deıin elektrondyq saýda segmentinde quqyqtyq retteýdi jetildirý boıynsha usynystar engizýdi tapsyrdy.
Premer-Mınıstr 2022 jyldyń birinshi jartyjyldyǵynda «e-tutynushy» júıesin azamattardyń ótinishterin júıeleý jáne memlekettik organdar tarapynan jedel áreket etý úshin birqatar memlekettik organnyń aqparattyq júıelerimen biriktirýdi tapsyrdy.
Aqparat jáne qoǵamdyq damý mınıstrligine saýda mınıstrligimen, Qarjy naryǵyn retteý jáne damytý agenttigimen jáne ákimdiktermen birlesip, qarjylyq qyzmetterdi tutynýshylardyń quqyǵyn qorǵaý máseleleri boıynsha halyqty aqparattandyrýdy kúsheıtý jáne azamattardyń qarjylyq saýattylyǵyn arttyrý tapsyryldy.