Jýyrda «Turaqty damý maqsattary: sapaly bilim» aıasynda Ibn Haldýn (Túrkıa) jáne ál-Farabı atyndaǵy Qazaq ulttyq ýnıversıteti Túriktaný jáne Shyǵys elderiniń tarıhy kafedrasynyń profesor-oqytýshy quramynyń birlese uıymdastyrýymen JOO-nyń túrik tili oqytýshylaryna arnalǵan «Qazaqstanda túrik tilin oqytý ádistemesi» atty bir aılyq halyqaralyq biliktilikti arttyrý semınary ótkizildi.
Atalmysh semınardyń alǵashqy 3 aptasy onlaın formatta ótip, sońǵy 1 aptasy Shyǵystaný fakúlteti Túriktaný jáne Shyǵys elderiniń tarıhy kafedrasynyń bazasynda oflaın formatta jalǵasty.
Semınar túrik tili oqytýshylarynyń aqparattyq-kommýnıkatıvti tehnologıalardy qoldaný, jasandy ıntellektiń múmkindikterimen tanystyrý, túrik tilin oqytý úderisinde stýdentterdiń sózdik qoryn baıytý jáne negizgi tildik daǵdylaryn damytý boıynsha biliktilikterin arttyrý maqsatynda uıymdastyryldy.
Semınar-trenıngte Ibn Haldýn, Stambýl, Gazı (Ankara) jáne ál- Farabı atyndaǵy Qazaq ulttyq ýnıversıtetteri men Iýnýs Emre ınstıtýty profesorlary men oqytýshylary mazmundy semınarlar ótkizip, túrik tilin tıimdi oqytýǵa yqpal etetin zamanaýı tehnologıalar men shet tilin oqytýdy sıfrlandyrý boıynsha ozyq pedagogıkalyq tájirıbelerimen bólisti.
Atalmysh semınarǵa ál- Farabı atyndaǵy Qazaq ulttyq ýnıversıteti, Abaı atyndaǵy Qazaq ulttyq pedagogıkalyq ýnıversıteti, Qazaq ulttyq qyzdar pedagogıkalyq ýnıversıteti jáne Abylaı han atyndaǵy Qazaq halyqaralyq qatynastar jáne álem tilderi ýnıversıtetiniń profesor-oqytýshylar quramy qatysyp, biliktilikterin arttyrdy. Oqytýshylar semınar sońynda test tapsyryp, ashyq sabaqtar ótkizdi.
Semınar joǵary deńgeıde jáne mazmundy ótti. Semınarǵa qatysýshylar semınar-trenıng ótkizgen profesorlar men oqytýshylarǵa, semınardy uıymdastyrýshy Ibn Haldýn atyndaǵy ýnıversıtet (Túrkıa) pen ál-Farabı atyndaǵy Qazaq ulttyq ýnıversıteti Túriktaný jáne Shyǵys elderiniń tarıhy kafedrasynyń profesor-oqytýshy quramyna alǵystaryn bildirdi.
Shyǵystaný fakúltetiniń dekany Natalá Borısovna Em biliktilikti arttyrý semınaryn joǵary deńgeıde uıymdastyrǵan ál-Farabı atyndaǵy Qazaq ulttyq ýnıversıteti Túriktaný jáne Shyǵys elderiniń tarıhy kafedrasynyń profesor m.a., PhD Qurmanáli Altynshash Arystanbekqyzy men Ibn Haldýn ýnıversıtetiniń oqytýshylary Gúl Gónúltash Sevınchgıl, Fýrkan Alpat, Harýn Aksý, Rýmeısa Shıshman, Melıke Nýr Chep, Merdıe Mansýr, Sýmeıra Bozkýrt Kahrıman jáne Shýra Faızıevti alǵys hattarmen marapattady.
Semınardyń jabylý saltanatty jıynynda «Túriktaný jáne Shyǵys elderiniń tarıhy» kafedrasynyń meńgerýshisi M. Sh. Egamberdıev biliktilikti arttyrý semınarynyń Qazaqstanda túrik tilin oqytýdyń sapasyn arttyrýǵa qosatyn ózindik úlesine nazar aýdaryp, osyndaı is-sharalardyń túrik tilin oqytýdyń tıimdi ádisterin meńgertýmen qatar, eki baýyrlas el arasyndaǵy mádenı jáne ǵylymı yntymaqtastyqty nyǵaıtýdaǵy mańyzdylyǵyna toqtaldy.
Ibn Haldýn atyndaǵy ýnıversıtettiń (Túrkıa) «Túrik jáne shetel tilderin oqytý jáne zertteý» ortalyǵynyń dırektory Fýrkan Alpat osy bir aılyq semınar barysynda JOO-nyń túrik tili oqytýshylarynyń túrik tilin oqytýdyń ınovasıalyq ádis-tásilderin qoldaný, túrik tilin shetel tili retinde oqytý úderisinde oqý materıaldaryn ázirleý jáne zamanaýı aqparattyq-kommýnıkatıvti tehnologıalar men jasandy ıntellekti qoldaný boıynsha biliktilikterin arttyrǵanyn tilge tıek etti. Fýrkan Alpat myrza munymen qatar, semınardyń joǵary deńgeıde uıymdastyrylǵanyn basa aıtyp, qazaqstandyq túrik tili oqytýshylarynyń kásibıligin jáne stýdentterdiń túrik tilin joǵary deńgeıde meńgergenin atap ótti.
Semınardyń jabylý saltanatynda biliktilikti arttyrý semınaryn tabysty aıaqtaǵan JOO-nyń túrik tili oqytýshylaryna 80 saǵattyq halyqaralyq sertıfıkat tabystaldy.
Atalmysh semınar Qazaqstanda túrik tilin oqytý úderisinde jańa múmkindikter ashyp, til mamandarynyń kásibı deńgeıin arttyrýmen qatar, baýyrlas eki el arasyndaǵy dostyqtyń jarqyn kórinisi boldy. Semınar bilim berý salasynda tájirıbe almasýmen qatar, Qazaqstan men Túrkıa arasyndaǵy mádenı jáne ǵylymı baılanystardy nyǵaıtýda mańyzdy qadamdarǵa jol ashty. Semınar barysyndaǵy túrik tilin oqytý boıynsha tájirıbe almasý jáne túrik tilin shetel tili retinde oqytýdyń ózekti máselelerin talqylaý ispetti is-sharalar baýyrlas eki el arasyndaǵy yntymaqtastyqty jańa deńgeıge kóterip, bolashaq ortaq ǵylymı-zertteý jáne ádistemelik jobalaryna uıytqy boldy degen senimdemiz.