Anka ushqyshsyz ushý apparaty kesheni keıin QR armıasyna qabyldanýy múmkin.
Jambyl oblysynda Anka túrik drondary synaqtan ótkizilip jatyr. Ushqyshsyz ushý apparattaryn synaqtan ótkizý jumystary Tarazdaǵy Jaýyngerlik daıarlaý jáne jaýyngerlik qoldaný oqý ortalyǵynyń bazasynda ótkiziledi, dep habarlaıdy Almaty-akshamy.kz Sarbaz.kz saıtyna silteme jasaı otyryp.
Synaqqa 14157 áskerı bóliminiń ushý jáne ınjenerlik-tehnıkalyq quramy jáne Turkish Aerospace Industries óndirýshi kompanıasynyń ókilderi qatysty.
Testter bastalǵanǵa deıin aralyq ınspeksıa, tehnıkalyq qabyldaý ótti. Sondaı-aq, ınjenerlik-tehnıkalyq quramnyń mamandary, ushqyshtar, paıdaly júkteme operatorlary Túrkıada daıyndyqtan ótti. Keshendi jetkizip, ornalastyrǵannan keıin qazaqstandyq mamandar synaqtarǵa kiristi.
"Testtik synaq — qabyldaý kezeńderiniń biri. Mindet-keshenniń, jabdyqtyń jáne barlyq qosalqy júıelerdiń jaramdylyǵyn tekserý qajet. Keshendi tájirıbelik áskerı eksplýatasıa 2023 jyldyń tamyzynda josparlanyp, 2024 jyldyń naýryz aıynyń ortasyna deıin jalǵasady", - dedi Jaýyngerlik daıarlyq jáne jaýyngerlik qoldaný oqý ortalyǵynyń bastyǵy polkovnık Shohan Musabekov.
"Synaqtardan sátti ótken jaǵdaıda Anka pılotsyz kesheni Qazaqstan armıasynyń qarýly kúshine qabyldanady", - delingen habarlamada.
Anka Taıaý Shyǵysta jáne Taýly Qarabaqtaǵy qaqtyǵystar kezinde qoldanyldy.
"Anka kesheniniń artyqshylyqtaryna onyń aýqymy, ushý uzaqtyǵy jáne soqqy dáldigi boıynsha joǵary kórsetkishteri kiredi. Onyń ushýy men qonýy úshin topyraq ushý-qoný jolaqtary, arnaıy jabdyqtalǵan aerodromdar qolaıly. Drondyń júk kótergishtigi 300 kg-ǵa deıin, al muzdan tazartý júıesiniń bolýy sýyq kúnde de ushýǵa múmkindik beredi", - dep jazady áskerı basylym.
Drondardyń negizgi múmkindikteri:
- barlaý, nysanǵa alý;
- artılerıalyq atysty túzetý;
- jerdegi nysandarǵa soqqy beretin avıasıany baǵyttaý;
- áýe shabýylyna qarsy qorǵanys quraldaryn ashý jáne eńserý;
- jaýdyń artyndaǵy asa mańyzdy obektilerdi joıý.
Osy faktilerdi eskere otyryp, QR Qorǵanys mınıstrliginde ushqyshsyz avıasıalyq júıelerdi damytý jáne qoldaný departamenti quryldy.