TikTok – álemde mıllıardtan astam adam paıdalanyp otyrǵan shyǵarmashylyq jáne ózin-ózi kórsetý, oıyn-saýyq jáne jańalyqtarǵa arnalǵan beıne platformasy.
Osy TikTok bizdiń elimizde brendterdiń shyǵarmashylyq áleýetin ashýda jáne marketıńke qatysty kózqarasty qaıta qarastyra otyryp, TikTok For Business platformasynyń tusaýyn kesti, dep habarlaıdy Almaty-akshamy.kz Egemen.kz-ke silteme jasap.
Sonymen bıyl Qazaqstandaǵy TikTok tómendegi baǵyttar boıynsha strategıalyq kúsh-jigerin jumsaýdy josparlap otyr. Máselen, TikTok Qazaqstandaǵy platforma kreatorlaryn biriktirý jáne oqytý úshin daryndardy damytý baǵdarlamasyn iske qosqan.
Oǵan qosa platformadaǵy kontenttiń alýan túrliligin yntalandyratyn áleýmettik mańyzy bar, tanymdyq jáne mádenı bastamalardy qurý úshin mamyr aıynda platforma #TıkTokQazaqstandaÚıren jobasyn iske asyrdy. Ol qazirdiń ózinde aýdıtorıa arasynda tanymal boldy jáne tanymdyq beınerolıkterdiń 35 mıllıonnan astam qaralymyn jınady.
Qazaqstandaǵy bıznestiń platformaǵa degen úlken qyzyǵýshylyǵyn kórgen TikTok jergilikti kompanıalarǵa kreatıvti jáne tıimdi jarnama formattary men quraldaryn meńgerýge kómektese otyryp, qoıan-qoltyq jumys isteýdi qolǵa almaq. Atap aıtqanda, Qazaqstanda IT-ındýstrıa men elektrondyq komersıanyń belsendi damýyn eskere otyryp, TikTok For Business osy ındýstrıalardyń bıznesimen yntymaqtastyqty nyǵaıtýdy josparlap otyr.
«TikTok for Business platformasynyń bir ereksheligi – bul bızneske jarnamalyq habarlamalardy aýdıtorıaǵa jetkizýmen ǵana shektelip qoımaıdy: paıdalanýshylarmen bir tilde sóılesý arqyly brendter olardyń senimi men súıispenshiligine ıe bola alady. Biz bızneske olardyń mindetterin barynsha tıimdi sheshýge múmkindik beretin sheshimderdi tabýǵa kómektesemiz. TikTok for Business quraldarynyń keń jıyntyǵy kez kelgen maqsatqa qol jetkizýge múmkindik beredi: jańa ónimdi naryqqa shyǵarýdan bastap satylymdy arttyrýǵa deıin. Biz qazaqstandyq kompanıalarǵa TikTok múmkindikterin ashýǵa jáne bizben seriktestikte óz bıznesiniń kórsetkishterin arttyrýǵa kómekteskimiz keledi», - deıdi Global Business Solutions, Shyǵys Eýropadaǵy TikTok Bas dırektory Anastasıa Panına.
Osy arada TikTok For Business yqpalynyń arqasynda kompanıalar jarnamaǵa degen kózqarasyn qaıta qarastyryp otyrǵanyn aıta ketken jón. Paıdalanýshylar dástúrli jarnamadan jalyqqan jáne úrdisterdi ustanatyn, shyǵaratyn jáne eksperıment jasaýdan, shynaıy jáne erekshe bolýdan qoryqpaıtyn kompanıalardy baǵalaıdy.