Qazaqstanda sım-bokstardy baqylaýǵa alý jáne bıometrıalyq verıfıkasıany engizý usynylýda.
Bul bastamany Senat depýtaty Janna Asanova kóterip otyr.
Bul týraly Aqshamnews.kz saıty habarlaıdy.
Sım-bokstar – bir ýaqytta júzdegen SIM-kartany qoldanýǵa múmkindik beretin qurylǵylar. Mundaı tehnologıany alaıaqtar keńinen paıdalanady. Senatordyń aıtýynsha, qazirgi zańnama SIP-telefonıamen kez kelgen adamnyń aınalysýyna ruqsat beredi, al sım-bokstar elge esh kedergisiz kirgiziledi. Bul azamattardyń qaýipsizdigine eleýli qaýip tóndiredi.
«Qylmyskerler SIP-telefonıa men sım-bokstardy keńinen qoldanýda. Sondyqtan biz bul salany qatań baqylaýǵa alýymyz kerek. Onyń ishinde SIP-telefonıany lısenzıalaýdy engizý – máseleni sheshýdiń bir joly. Bul júıeni baqylaýǵa múmkindik beredi», – dedi Janna Asanova.
Senator, sondaı-aq, sım-bokstardy zańsyz paıdalaný jáne SIP-telefonıany qylmystyq maqsatta qoldaný úshin jazany kúsheıtýdi usyndy. Bul sharalar telefon arqyly jasalatyn alaıaqtyqpen kúresti kúsheıtýge baǵyttalǵan.