Qazaqstanda sheteldik stýdentter sany udaıy ósip keledi. 2024/2025 oqý jylynda elimizde 28,5 myń sheteldik stýdent bilim alýda, bul ótken jylmen salystyrǵanda 12,8%-ǵa kóp. Bul kórsetkish Qazaqstannyń joǵary oqý oryndarynyń halyqaralyq deńgeıde tanylyp, bilim berý júıesiniń tartymdylyǵyn arttyrýda, dep habarlaıdy aqshamnews.kz
Sheteldik stýdentterdiń quramynda túrli elderden kelgen jastar bar. Olardyń jartysynan kóbi alys shetelderden kelgender, eń kóp sany – 9,3 myń adam, olar Indıadan. Al, TMD elderinen kelgen stýdentter sany shamamen jartysyn quraıdy. Ekinshi orynda – Ózbekstan azamattary (4,6 myń adam), úshinshi orynda – Túrkimenstannan kelgender (4,4 myń adam).
Qazaqstannyń joǵary oqý oryndaryndaǵy jalpy stýdentter sany da ósýde. 2024/2025 oqý jylynda elimizdiń joǵary oqý oryndarynda 624,5 myń stýdent bilim alýda, bul ótken jylmen salystyrǵanda 5,4%-ǵa kóp. Almaty qalasy elimizdegi basty bilim berý ortalyǵy bolyp qalyptasyp keledi, munda stýdentterdiń úshten biri bilim alýda – 202 myńnan astam stýdent. Almaty ýnıversıtetteriniń úlesi jyl saıyn artyp keledi: 2019 jyly ol 26,9%-dy qurasa, qazirgi tańda 32,3%-ǵa jetken.
Aldaǵy ýaqytta Almaty men onyń aınalasyndaǵy jańa «aqyldy» megapolıs Alataý aımaǵy bilim berý habyna aınalýy múmkin. Bul tek bilim berý salasynda ǵana emes, jalpy ekonomıka men ınfraqurylymnyń damýyna da oń áserin tıgizedi. Sheteldik stýdentter elimizdiń ekonomıkalyq damýynda mańyzdy ról atqarady. Olar bilim alý barysynda elimizdiń ekonomıkasyna ınvestısıalar ákeledi, sondaı-aq ýnıversıtetter aınalasynda qalyptasatyn ekojúıe arqyly saýda, mádenıet jáne týrızm salalary damıdy.
Bul úrdis Qazaqstannyń halyqaralyq bilim berý naryǵynda mańyzdy oryn alýyna yqpal etedi jáne bolashaqta jańa ekonomıkalyq ósý núkteleriniń biri bolýy múmkin.