Oıynshyqtar eń aldymen zań boıynsha qaýipsiz bolýy kerek
Qazaqstanda satylatyn oıynshyqtardyń 43,5% sanıtarlyq jáne basqa da talaptarǵa saı emes bolyp shyqty. Osy rette elimizdiń Sanıtarlyq epıdemıologıalyq baqylaý komıteti ata-analardy balalaryna oıynshyq satyp alýda oıynshyqtyń talapqa saı bolýyn qadaǵalaý kerektigin eskertti, dep habarlaıdy Almaty-akshamy.kz.
Komıtettiń baspasóz qyzmeti taratqan aqparattarǵa qaraǵanda, Sanıtarlyq epıdemıologıalyq baqylaý komıteti elimizde saýdalanatyn oıynshyqtardyń sapasy men olardyń tıisti talaptarǵa saı bolýyna udaıy monıtorıń júrgizip otyr.
Mysaly bıylǵy jyldyń 2 aıynda sanıtarlyq epıdemıologıalyq baqylaý komıtetiniń ókilderi respýblıka boıynsha 397 oıynshyq úlgisin iriktep alyp, zerttegen. Nátıjesinde iriktelgen oıynshyqtardyń 173-i talapqa saı emes bolyp shyqty.
«Bul saýdadaǵy jalpy oıynshyqtardyń 43,5%-y. Onyń ishinde, otandyq oıynshyqtar (0,5%), EAEO - ǵa múshe memleketter óndirgen oıynshyqtar - 16 (9,2%), basqa elderdiki 156 (90,1%)», - deıdi mamandar.
Onyń ishinde:
1. Tańbalaýǵa qatysty 100%,
2. organoleptıkalyq kórsetkishter boıynsha - 3,4%,
3. sanıtarıalyq-hımıalyq kórsetkishter boıynsha - 8% (oıynshyqtyń quramynda Qytaı men Ózbekstan Respýblıkasynda óndirilgen oıynshyqtarda fenol, formaldegıd, benzol, metıl spırti, geptan deńgeıiniń artýy anyqtaldy).
«Balalarǵa qaýipsiz emes taýarlardy satýmen aınalysatyn barlyq kásipkerlik sýbektilerine zańbuzýshylyqtardy joıý týraly nusqama berildi»,-delingen komıtet ókilderi taratqan aqparatta.
Sondaı-aq onda saýda kásiporyndarynda eki aıda satýdan 3,6 kg oıynshyq alynǵany aıtylǵan.
«Oıynshyqtardy árkim óz qalaýymen tańdaıdy. Bireý belgili bir óndirýshi kompanıaǵa, basqalary baǵaǵa, al endigiberýileri syrtqy kelbetine nazar aýdarady. Alaıda, satyp alý kezinde barlyq ata-ana satýshylardan birdeı qýyrshaqtardyń nemese oıynshyq mashınalardyń qaýipsizdigin rastaıtyn qujattardy talap etpeıdi. Al balalar oıynshyqtary eń aldymen zań boıynsha qaýipsiz bolýy kerek. Oıynshyqtardy bizdiń elimizdiń aýmaǵynda satpas buryn Keden odaǵynyń «oıynshyqtardyń qaýipsizdigi týraly» tehnıkalyq reglamentindegi qaýipsizdik talaptaryna saı bolýy kerek»,-deıdi mamandar.