Búgin Parlament Májilisiniń jalpy otyrysynda «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýsıalyq zańyna ózgerister men tolyqtyrýlar engizý týraly» QR Konstıtýsıalyq zańy maquldandy, dep habarlaıdy Almaty-akshamy.kz
Ádilet mınıstri Qanat Mýsınniń aıtýynsha, buǵan deıin partıalyq tizimderde áıelder men jastardyń 30 paıyzdyq kvotasyn saqtaý týraly norma engizilgen bolatyn. Osydan keıin Memleket basshysy erekshe qajettilikteri bar adamdarǵa zańnamalyq qyzmetke qatysýǵa jaǵdaı jasaýdy tapsyrdy.
«Osy tapsyrmany iske asyrý maqsatynda "Saılaý týraly" Konstıtýsıalyq zańǵa engiziletin ózgerister ázirlendi. Oǵan sáıkes, áıelder, 29 jasqa tolmaǵan jáne múgedek adamdar úshin 30 paıyzdyq kvotadan bólek, Májiliste depýtattyq mandattardy bólý kezinde olardy esepke alý qajettiligi bekitiledi», - dedi Mýsın.
Depýtattar burynǵy áriptesine birneshe suraq qoıdy. Janarbek Áshimjan kandıdattardy usyný kezinde kvotanyń saqtalatynyn, al tizimdi bekitkende, ondaı mindetti qalaı oryndaý qajettigin surady. Mınıstr Mýsınniń aıýtynsha, kandıdattardy tirkeý kvotasy qatań saqtalýy qajet. Al árbir saıası partıa kimge qansha oryn beriletinin ózi sheshedi.
«Usynylyp otyrǵan Konstıtýsıalyq zań jobasy nysanaly toptarmen ártúrli alańdarda qaraldy. Jalpy alǵanda, bul túzetýler áıelderdiń, jastardyń, erekshe qajettilikteri bar adamdardyń elimizdiń zań shyǵarý organynda ókildigin keńeıtý úshin mańyzdy qadam bolyp sanalatynyn atap ótken jón. Bul zańdardyń sapasyna sózsiz áser etedi», - dedi Ádilet mınıstri.
Tizimde kvotalyq kandıdattardyń sany odan kóp bolýy da múmkin.
Basqa depýtattar 30 paıyzdyq kvotada áıelder, jastar men múgedekterdiń naqty úlesin bekitýdi usyndy. Sebebi ondaı tájirıbe shetelde bar. Ádilet mınıstri ondaı qajettilik joq dep sanaıdy. Óıtkeni árbir partıa óz maqsattary men josparyna qaraı kvotalyq oryndaryn rettep otyrady.
Májilis "Qazaqstan Respýblıkasyndaǵy saılaý týraly" Qazaqstan Respýblıkasynyń Konstıtýsıalyq zańyna ózgerister men tolyqtyrýlar engizý týraly" konstıtýsıalyq zańnyń jobasyn maqulady. Osyǵan baılanysty Saıası partıalar týraly" zańǵa da ózgeris engizildi. Eki qujat Senatqa joldandy.