Partıa qurý tártibi edáýir jeńildetilip jatyr.
Prezıdenttiń partıadan shyǵýy saıası básekelestikti arttyrady, barlyq partıalardyń damýy úshin teń jaǵdaılar jasaıdy. Bul týraly Konstıtýsıalyq keńestiń apparat basshysy, Konstıtýsıaǵa engiziletin ózgerister men tolyqtyrýlar jóninde usynystar daıyndaý boıynsha jumys tobynyń múshesi Baqyt Nurmuhanov málim etti, dep habarlaıdy Almaty-akshamy.kz QazAqparatqa silteme jasap.
«Qazir jobada Prezıdent saıası partıadan shyǵady dep kórsetilgen. Memleket basshysy konstıtýsıalyq reformadan buryn partıadan shyqty. Bul óz kezeginde saıası básekelestikti arttyrady. Bolashaqta Saıası partıalar týraly zańǵa da ózgerister engiziledi. Saıası partıa qurý tártibi edáýir jeńildetilip jatyr. Sondyqtan saıası arenada jańa saıası kúshter paıda bolyp, ókildi organdarda jańa depýtattar saılanýy yqtımal», - dedi Baqyt Nurmuhanov Ortalyq komýnıkasıalar qyzmetinde.
Budan buryn habarlanǵandaı, bıyl Joldaýda Memleket basshysy Qasym-Jomart Toqaev Prezıdent óziniń ókilettigin atqarý kezeńinde partıaǵa músheligin toqtata turýǵa mindetti ekenin zań júzinde resimdeýdi usyndy.
Bıyl sáýir aıynda AMANAT partıasynyń tóraǵasy retinde Prezıdenttiń ókilettigi toqtady.
«Men buǵan deıin partıa tóraǵasy laýazymynan bosap, uıym qatarynan shyǵatynymdy aıttym. Osy uıǵarymdy júzege asyratyn kez keldi. Búginnen bastap AMANAT partıasynyń tóraǵasy retinde ókilettigimdi toqtatyp, partıadan shyǵý týraly sheshim qabyldadym. Bul qadamnyń sımvoldyq máni bar. Osy oraıda Prezıdent saılaýynda maǵan senim artyp, qoldaǵandaryńyz úshin barshańyzǵa alǵysymdy aıtqym keledi. Sondaı-aq jaýapty sátte partıa tizginin senip tapsyrǵandaryńyz úshin rızashylyǵymdy bildiremin», - dedi Memleket basshysy.