Qurylysta jumys istegen kompanıalar sany 50,3 myń boldy.
Qurylys salasy – el ekonomıkasynyń qozǵaýshy kúshi. Bıyl da atalmysh sektor kóleminiń ósý qarqyny baıqalady. Mysaly, 2022 jyldyń 6 aıynyń qorytyndysy boıynsha, JİÓ bir jylda 3,6%-ǵa ulǵaısa, qurylys salasyndaǵy ósim 9,2%-ǵa jetken. Bul sala aqparat jáne baılanys salasymen qatar kósh bastap tur (+12,6%), dep habarlaıdy Almaty-akshamy.kz Inbusiness.kz silteme jasap.
Búginde qurylys salasy eldiń JİÓ-niń 5%-yn "taza" qurap otyr. Ol óńdeý ónerkásibi, mashına jasaý men qurylys materıaldaryn óndirý, saýda, kóliktik-logıstıkalyq sala jáne basqa da salalardy yntalandyrady.
Budan bólek, ol elimizdiń áleýmettik-ekonomıkalyq damýyna da aıtarlyqtaı úles qosyp keledi. Sektorda 637,5 myń adam jumys isteıdi. Qurylys salasy saýda, agroónerkásiptik keshen jáne bilim berý salalary sıaqty jumys berýshi retinde kósh bastap tur. Qurylysta jumyspen qamtylǵandar sany eldegi barlyq jumyspen qamtylǵandardyń 7,2%-yn quraıdy. Al, naqty sektordaǵy (qurylys, ónerkásip, AÓK, kólik jáne baılanys salalary kiredi) jumyspen qamtylǵandardyń 17,4%-y tıesili.
Sonymen qatar qurylys salasy Qazaqstandaǵy bıznes-belsendilikke de yqpal etip otyr. Sebebi bul sektor kompanıa sany boıynsha elimizde aldyńǵy orynda tur.
Osy jyldyń tamyz aıynda qurylysta jumys istegen kompanıalar sany 50,3 myń boldy. Ótken jyldyń sáıkes kezeńimen salystyrǵanda 11,2%-ǵa artyq. Bul eldegi barlyq jumys istep turǵan kásiporyndardyń 13,3%-yn jáne naqty sektordaǵy barlyq kásiporynnyń 41,9%-yn qurady.