Osy ýaqytqa deıin 162 qazaqstandyq osy oqý ornyn bitirdi
Bul týraly AQSH-qa jumys saparymen barǵan Ǵylym jáne joǵary bilim mınıstri Saıasat Nurbek habarlady, dep habarlaıdy Almaty-akshamy.kz
«Bizdiń mınıstrliktiń basty maqsattarynyń biri - álemdik standarttar boıynsha kadr daıarlaý ekeni barshańyzǵa belgili. Ol úshin oqý prosesin barynsha tájirıbege baǵdarlaý jáne álemniń jetekshi joǵary oqý oryndarynyń akademıalyq modelin qoldaný qajet. Amerıkalyq ýnıversıtetter barlyq álemdik reıtıńterde laıyqty kósh bastap keledi. Mysaly, bir ǵana Times Higher Education reıtıńinde TOP-10 joǵary oqý ornynyń 7-eýi — bul AQSH ýnıversıtetteri. Búgin Pensılvanıa memlekettik ýnıversıtetiniń top-menedjmentimen mańyzdy kezdesý ótkizdim. Atap aıtsaq, PennState vıse-prezıdenti (Provost) Justin Schwartz-pen, vıse-provost Roger Brindley-men, Pensılvanıa memlekettik ýnıversıtetiniń IT, zań mektebiniń dekandarymen júzdestim. Pensılvanıa memlekettik ýnıversıtetiniń ókilderimen buǵan deıin de kezdesken edik. Onyń nátıjesinde atalǵan oqý orny qazaqstandyq stýdentter men elimizdiń ǵalymdary úshin granttar túrinde 1 mlrd teńge nemese 2 mln dollar kóleminde tikeleı ınvestısıa bólgen edi. Bul joba qazir iske asyrylyp jatyr», - dep jazdy mınıstr.
Sondaı-aq ol Pensılvanıa memlekettik ýnıversıteti uzaq jyldardan beri Qazaqstannyń seriktesi bolyp kele jatqanyn atap ótti.
- «Bolashaq» baǵdarlamasy bastalǵan sátten bastap barlyq amerıkalyq joǵary oqý oryndary arasynda, osy ýnıversıtet Qazaqstannan barynsha kóp stýdent qabyldady. Osy ýaqytqa deıin 162 qazaqstandyq osy oqý ornyn bitirdi. Búgingi kezdesýde biz Qazaqstanda Pensılvanıa memlekettik ýnıversıtetiniń fılıalyn ashý boıynsha naqty qadamdardy talqyladyq. Amerıkalyq joǵary oqý ornynyń basshylyǵy bul bastamaǵa qoldaý kórsetti. Qazirdiń ózinde máseleni tıisti pysyqtaý jumystary bastaldy. Resmı kezdesýlerden keıin men Pensılvanıa memlekettik ýnıversıtetinde oqıtyn qazaqstandyqtarmen jolyqtym. Jastar shetelde oqýdan alǵan óz áserlerimen bólisti. Stýdentterge Qazaqstanda joǵary bilim jáne ǵylym salasynda júrgizilip jatqan reformalar týraly áńgimeledim. Jas zertteýshiler men ǵalymdardy qoldaý boıynsha memleket qolǵa alyp otyrǵan sharalardy erekshe atap óttim», - dedi Saıasat Nurbek.