Aıadaı aýyldaǵy qos kolejdiń shákirtteri tártibin túzemese, jaza eki ese qatańdaýy múmkin.
Oıynnan ot shyqty. Almaty oblysy Uzynaǵash aýylyndaǵy jasóspirimder arasyndaǵy janjaldyń neden shyqqany belgili boldy, dep habarlaıdy Almaty-akshamy.kz Almaty.tv-ge silteme jasap.
Ekeýara kelise almaǵan 16 jastaǵy stýdentter aýyl ishindegi saıabaqta kezdesip, esep aıyryspaq bolǵan eken. Este bolsa, Uzynaǵash medısınalyq kolejiniń ekinshi kýrs stýdenti basqa oqý ornynyń stýdentin taıaqtyń astyna alǵan vıdeosy áleýmettik jelige tarap ketken edi. Qara kúrteshe kıgen qyzdyń qyzyl kıimdegi jasóspirimdi jaǵasynan alyp, judyryqtap jatqanyn anyq kórýge bolady. Vıdeony túsirip turǵan er-azamattardyń tóbeleske qatysqandardy ajyratýǵa qulyqsyz ekenin de baıqalady. Qyzýqandylyqqa salyndyq degen stýdentter bári oıynnan bastaldy dep otyr.
«Bir-birimizdiń sózimizdi kótere almaı, eregesip qaldyq. Sol jerde emosıaǵa berilip kettik. Nuraıdyń murny qanaǵanda, men ózim qorqyp qaldym», – dedi stýdent Dılnoz.
Jelide judyryq jumsady degen jasóspirim dál osy Uzynaǵash medısısınılyq mekemesinde ekinshi kýrsta oqıdy eken. Oqý orynynyń ákimshiligi stýdenttiń tártibi jaqsy ekenin aıtty. Alaıda kópshilik ony asqan qatygezdikpen judyryq jumsaǵany úshin jazaǵa tartý keregin aıtady.
Atalǵan medısınalyq mekemeniń basshysy bul beınejazbanyń keshe ǵana shyǵýy bizge jasalǵan qastandyq dep otyr. Al eki jas arasyndaǵy janjaldy qarapaıym jaǵdaı dep baǵa berip otyr.
«Ózderi saıabaqqa shaqyrǵan. Bireý ádeıi sýretke túsirgen. Olar bir aýylda turady. Bári biledi. Konflıkt ár jerde bolady, mysaly, úıde de tóbelesedi», – dedi Uzynaǵash medısınalyq kolejiniń dırektory Ildar Iýldabaev.
«Búgingi kúni bilip jatyrmyz ǵoı. Oǵan mindetti túrde shara qoldanylady. Tárbıe isinde osaldyq tanytqan», – dedi bilim basqarmasynyń tehnıkalyq jáne kásiptik bilim berý bóliminiń basshysy Ámına Tórebaeva.
«Negizi bir aı buryn bolǵan. Osy 3 jeltoqsanda keshirim surap, sheship tastaǵanbyz. Biraq osy aıda qaıdan taraǵanyn bilmeımiz. Basynda negizi oıyn bolǵan, oınap júrdik. Sol jerde "qadaı almaısyń" degen sózge bola tiresip turdyq. Oıynnan ot shyqty. Taıaq jegende, dos bolǵan soń, artyq ketken joq», – dedi zardap shegýshi Nuraı.
«Ákimshilik quqyqbuzýshylyq kodeksiniń 127-baby, ıaǵnı ata-analardyń óziniń ata-analyq mindetin durys atqarmaý degen bapqa materıalǵa qujat jınalýda. Ekeýi bir-birimen tatýlasyp, eki jaqtyń da bir-birine kiná taqpaıtyny, bir-birine aryz jazbaǵany anyqtalyp otyr», – dedi Jambyl aýdandyq polısıa bóliminiń bastyǵy Asqat Danıar.
Búgin polısıa basqarmasynda taraptar kezdesip, bul jaıtty taǵy talqylady. Aıadaı aýyldaǵy qos kolejdiń shákirtteri tártibin túzemese, jaza eki ese qatańdaýy múmkin. Al ázirge isti ákimshilik sot baqylaýda ustaıdy.